बुटबल ८ चैत ।
रुपन्देहीमा तेक्वान्दो खेललाई मर्यादित, ब्यवस्थित र ब्यवसायीक बनाउनका लागि (आइ.टि.एफ.) तेक्वान्दो संघ गठन गरिएको छ । बिहिबार बुटबलमा खेलकुदसंग सम्बन्धित विज्ञहरुबीचको छलफल पछि कृष्ण नेपालको अध्यक्षतामा ९ सदस्यीय जिल्ला कार्यसमिति रुपन्देही गठन गरिएको हो ।
नव गठित कार्यसमितिको उपाध्यक्षमा नवराज खरेल र ज्वाला पून, सचिवमा बोम बुढामगर, कोषाध्यक्षमा राधा बिश्वकर्मा, सदस्यहरु सुमन शेर्पा, सागर मल्ल, केशव राज ज्ञवाली, र बिशाल रावत रहेका छन् ।
तक्वान्दो खेललाई जिल्लामा स्थापित गर्दै अन्र्तराष्ट्रिय स्तरसम्म प्रतिस्पर्धा गर्नका लागि खेलाडी उत्पादन गर्न आफुहरु प्रतिबद्ध रहेको नवगठित कार्यसमितिका अध्यक्ष कृष्ण नेपालले जानकारी दिए । उनले नयाँ पीडीलाई खेल क्षेत्रमा आकर्षित गर्न र खेलकै माध्यमबाट देशलाइ अन्र्तराष्ट्रिय स्तरसम्म चिनाउन जिल्लामा तेक्वान्दो संघको आवश्यकता रहेको बताए ।
नवगठित कार्यसमितिका उपाध्यक्ष नवराज खरेलले मानिस स्वस्थ रहन मर्यादित समाज निर्माण गर्न खेल क्षेत्रले महत्वपूर्ण योगदान गर्न सक्ने भन्दै राज्यले खेलकुदको बिकासमा लगानी गर्नु पर्ने बताए । उनले तेक्वान्दो खेल आफैमा अनुशासित खेल भएकाले यस खेलले बालबलिकालाई अनुशासनमा बाँधी असल नागरिक उत्पादनमा टेवा पुर्याउन सहयोगी भुमिका खेल्ने धारणा ब्यक्त गरे ।
तेक्वान्दो प्रशिक्षक तथा समितिका सचिव बोम बुढागरले तेक्वान्दो खेल बहु आयामिक खेल भएका कारण यसको बिकास र प्रर्वद्धनका लागि राज्यले ठोस पहल गर्नु पर्ने धारण ब्यक्त गरे । नव गठित कार्यसमितिले खेलकुद क्षेत्रमा देखिएका बिकृति र बिसङ्गतीलाई चिर्दै सभ्य र मर्यादित समाज निर्माण गर्ने भन्दै आफुहरु यसप्रति प्रतिबद्ध रहेको उनको भनाई छ ।
नव गठित कार्यसमितको पहिलो बैठकले बुटबल उपमहानगरपलिकामा आउँदो जेठ पहिलो हप्ताभित्र खुल्ला तेक्वान्दो प्रतियोगिता गर्ने निर्णण समेत गरेको सचिव बुढामरले जानकारी दिए ।