२०८१ चैत्र २३
बुटवल ८ चैत्र ।
शिक्षक सहिद खडक बहादुर देवकोटा स्मृति तथा शिक्षक बलिदान दिवस एकीकृत अखिल नेपाल शिक्षक संगठन र अखिल नेपाल शिक्षक संगठनद्वारा संयुक्त रूपमा बुटवलमा शुक्रबार मनाएको छ।
कार्यक्रममा अखिल नेपाल शिक्षक संगठनका केन्द्रीय सल्लाहकार समितिका संयोजक तथा बुटवल कालिका क्याम्पसका क्याम्पस प्रमुख घनश्याम पाठकले माओवादी आन्दोलनमा जोडिएका शिक्षक कर्मचारीहरू एकजुट भएर कार्यक्रम गरेकोमा खुसी व्यक्त गरे । शैक्षिक तथा बौद्धिक तप्काले देशभरिबाट दबाब सिर्जना गरेर माओवादी आन्दोलनलाई एकजुट हुन बाध्य पार्नुपर्नेमा जोड दिँदै उनले यसको पहल गर्न र आफ्ना कमजोरीहरूको आत्म समीक्षा सहित मुख्य नेतृत्व लाग्नुपर्ने धारणा व्यक्त गरे ।
अखिल नेपाल शिक्षक संगठनका केन्द्रीय सह अध्यक्ष गुणाखर भट्टराई , एकीकृत अखिल नेपाल शिक्षक संगठनका केन्द्रीय सदस्य गंगालाल प्रधान, एकीकृत अखिल नेपाल शिक्षक संगठनका केन्द्रीय सल्लाहकार प्रेमबहादुर बस्नेत, अखिल नेपाल शिक्षक संगठन बुटवलका अध्यक्ष दीपक बन्जाडे लगायतले धारणा व्यक्त गरेका थिए ।
अखिल नेपाल शिक्षक संगठन रूपन्देहीका अध्यक्ष रेशम चालिसेको अध्यक्षतामा एकीकृत अखिल नेपाल शिक्षक संगठन रूपन्देहीका अध्यक्ष रोमनाथ न्यौपानेको सञ्चालनमा सम्पन्न कार्यक्रममा अखिल नेपाल शिक्षक संगठन रूपन्देहीका संस्थापक अध्यक्ष प्रेमबहादुर बस्नेत, जीवन उपाध्याय ,महेश पाण्डे ,खोपलाल पाण्डे र कुन्ती भुसाल देवकोटालाई सम्मान गरिएको थियो।
कार्यक्रममा कालिका मानव ज्ञान माविका प्रधानाध्यापक दिनेश थापा, लोकराज घिमिरे ,पिताम्बर बन्जाडे, दिलीप बेलबासे ,बृहस्पति शुक्ल हिस्टूनका पूर्व अध्यक्ष कृष्ण अधिकारी, शेरचन्द्र गिरी र हरिष वली लगायतको सहभागिता रहेको थियो।