६ अर्ब लागत, १२ सय शैय्या विस्तार गरिने
बुटवल १२ चैत ।
बुटवलस्थित लुम्बिनी प्रादेशिक अस्पतालमा बन्न लागेको १२ तले भवनको काम तीव्र रूपमा अघि बढेको छ । लुम्बिनी सरकारको गौरवको आयोजनाका रूपमा विशेष महत्व दिइएको भवन निर्माणमा दैनिक तीन सयजनाभन्दा बढी जनशक्ति खटिने गरेका छन् । प्रादेशिक अस्पताललाई १२ सय बेडको बनाउने लक्ष्यसहित दुईवटा नयाँ भवन बनाउने काम अगाडि बढाइएको छ । दुई तहको बेसमेन्ट भएको सात सय शैय्याको १० तले मुख्य भवन (दुईतले अन्डरग्राउन्डसहित १२ तले) र अर्को एक तहको बेसमेन्टसहित पाँचतले सय शैय्या क्षमताको क्यान्सर उपचार भवन निर्माण हुनेछ ।
लुम्बिनी प्रदेश पूर्वाधार विकास प्राधिकरणमार्फत ६ अर्ब १८ करोड ७५ लाख रुपैयाँ लागतमा भवन निर्माण कार्य थालिएको हो । गत १५ भदौमा अस्पताल भवनको शिलान्यास गरिएको थियो । प्रदेश पूर्वाधार विकास प्राधिकरणले भारतीय निर्माण कम्पनी क्याप साइट आशिष रेलिग्रेट भेन्चर र नेपाली कम्पनी आशिष रेलिगसनसँग २६ पुस ०८० मा भवन निर्माणका लागि ठेक्का सम्झौता गरेको थियो । शिलान्यास भएको ६ महिनाको अवधिमा १६ प्रतिशत भौतिक प्रगति भएको प्रदेश पूर्वाधार विकास प्राधिकरणका साइट इन्चार्ज इन्जिनियर शंकर सुवेदीले बताए । सम्झौताअनुसार १२ तले भवन ०८५ पुस मसान्तसम्म सम्पन्न हुनुपर्नेछ ।

भवन निर्माणका लागि कन्सल्टेन्टका तर्फबाट काठमाडौं युनिभर्सिटीअन्तर्गत काठमाडौं युनिकन्सल्ट सेन्टरबाट आठजनाको टिम र पूर्वाधार विकास प्राधिकरणको टिमसहित तीन सयजनाभन्दा धेरै जनशक्ति खटिएको सुवेदीले बताए । अहिले बेसमेन्टको काम भइरहेको छ । यसका लागि रड बुन्ने, बिछ्याउने, पिलर उठाउने र ढलानको काम हुँदै छ ।

अस्पताल भवनमा हेलिप्याड
नयाँ भवनको सबभन्दा माथि हेलिप्याड हुनेछ । हेलिप्याडबाट सीधै इमर्जेन्सी वार्डमा आउजाउ गर्न मिल्ने लिफ्ट पनि निर्माण हुनेछ । बेसमेन्टको कामसँगै लिफ्टका लागि पिलर उठाउने कार्य पनि भइरहेको छ । नयाँ भवन बनेपछि ओपिडी, इमर्जेन्सी सेवा यहीँबाट प्रदान गरिनेछ । ग्यास्ट्रो, न्युरो, कार्डियोलोजीलगायत सबै विशेषज्ञ सेवा एउटै भवनबाट सञ्चालन गरिनेछ । हाल उपचारका लागि प्रयोग गरिएका तीनवटा भवनका सेवा नयाँ भवनमा सारिने भएको छ । पुराना भवनहरू डायग्नोस्टिक एन्ड रिसर्च, प्रसूति तथा महिला र बालरोग उपचारका लागि प्रयोग गरिने अस्पतालले जनाएको छ । अहिले निर्माण भइरहेको भवनको दक्षिणतर्फ क्यान्सर उपचारका लागि छुट्टै भवन निर्माण हुनेछ, जसको जग खन्ने कार्य भइरहेको छ । भवन पाँचतले हुनेछ र एक सिंगल बेसमेन्ट रहनेछ ।

प्रदेश सरकारले चालू आर्थिक वर्षमा भवन निर्माणका लागि एक अर्ब ८० करोड बजेट विनियोजन गरेको छ । प्रदेश गौरवको आयोजनाअन्तर्गत बन्ने यी भवनले स्वास्थ्य क्षेत्रमा निकै महत्व राख्ने अस्पतालका मेडिकल सुपरिटेन्डेन्ट डा. इन्द्र ढकालले बताए । भवन बनेपछि सेवा विस्तार हुने र विशिष्टीकृत सेवा प्रवाह हुँदा स्वास्थ्य क्षेत्रसँगै आर्थिक क्षेत्रमा पनि सकारात्मक प्रभाव पार्ने उनको भनाइ छ ।

लुम्बिनी प्रदेशका मुख्यमन्त्री चेतनारायण आचार्यले भवन निर्माणको काम सन्तोषजनक ढंगले अघि बढिरहेको बताए । ‘यही हिसाबले काम अघि बढ्यो भने तीन वर्षभित्र भवन सम्पन्न हुनेछ भन्ने आशा जागेको छ,’ उनले भने, ‘यही आर्थिक वर्षमा २८ प्रतिशतसम्म काम सम्पन्न गर्ने रिपोर्टिङ प्राप्त भएको छ । हालसम्मको कामलाई मूल्यांकन गर्दा सन्तोषजनक देखिएको छ ।’

१५ फागुन १९६७ मा ६ शड्ढयाबाट सुरु भएको यो अस्पताल लुम्बिनी क्षेत्रकै सबभन्दा पुरानो र ठुलो अस्पताल हो । सेनवंशीय राजा मणिमुकुन्द सेनको दरबार रहेको स्थान बुटवल फूलबारीबाट दुईजना चिकित्सकबाट अस्पतालको सेवा सुरु गरिएको थियो । ३१ वर्ष बुटवल फूलबारीबाट सञ्चालन भएको अस्पताललाई १९९८ मा हाल रक्तसञ्चार गृह रहेको स्थानमा सारिएको थियो । हाल रहेको स्थानमा भने ०१६ मा भवन निर्माण गरी सारिएको थियो । यहाँ हाल दैनिक दुई हजारदेखि २५ सयसम्म बिरामी उपचारका लागि आउने गर्छन् ।