कति परिचालन हुँदैछ जनशक्ति ?

बुटवल ४ चैत ।
रुपन्देहीमा यस पटक २३ हजार भन्दा पनि धेरै विद्यार्थीे एसईईको परिक्षामा सहभागि हुने भएका छन् । यी विद्यार्थीका लागि ६० वटा परिक्षा केन्द्र निर्धारण गरिएको छ ।
रुपन्देहीमा नियमित तथा ग्रेड वृद्धिका ५७ वटा परीक्षा केन्द्र, प्राविधिक धारका दुईवटा परीक्षा केन्द्र र पुरानो ग्रेड वृद्धिको एक परीक्षा केन्द्र गरी ६० वटा परीक्षा केन्द्र कायम गरिएको छ ।
शिक्षा विकास तथा समन्वय इकाई रूपन्देहीका अनुसार सामुदायिकतर्फ १७६ वटा विद्यालयका र निजी तथा आवासीय विद्यालयबाट १७० वटा विद्यालय गरी ३४६ विद्यालयका नियमिततर्फ १७ हजार ५ सय १८, ग्रेड वृद्धि ४हजार ९ सय ३९ गरी जम्मा २२ हजार ४ सय ५७ विद्यार्थी परिक्षामा सहभागि हुदै छन् । त्यस्तै प्राविधिक धारतर्फ नियमित ४०३ ग्रेड वृद्धितर्फ ११५ गरी जम्मा ५१८ र २०८० साल भन्दा अगाडिका २८४ जना विद्यार्थीहरू परीक्षामा सहभागी हुने भएका छन् गत वर्षभन्दा यस वर्ष थप भएका विद्यार्थी संख्या ३ हजार २ सय ८० रहेको छ ।
जनशक्ति तर्फ जिल्ला परीक्षा समन्वय समितिमा ५ जना, केन्द्राध्यक्ष ६० जना, सहायक केन्द्राध्यक्ष १ सय ५२ जना, निरीक्षक १हजार १ सय ७३ जना, सहायक कर्मचारी २ सय ३५ जना, सहयोगी ४सय ७० जना गरी जम्मा २ हजार ५८ जनशक्ति परिचालन हुनेछ । त्यस्तै जनपथ प्रहरी र सशस्त्र प्रहरी आवश्यकता अनुसार परीक्षा केन्द्रमा परिचालन हुनेछन् । रूपन्देही जिल्लाको यस वर्ष सबैभन्दा ठूलो परीक्षा केन्द्र गिवार्ण संस्कृत तथा साधारण मावि मणिग्राममा ६सय ५८ जना शान्ति नमुना माविका विद्यार्थीहरू र जिल्लाको सबैभन्दा सानो परीक्षा केन्द्र नवरत्न मावि सेमलारमा १ सय ६१ जना विद्याथी रहेका छन् ।
परिक्षाको तयारीका क्रममा शिक्षा विकास तथा समन्वय इकाई रूपन्देहीको आयोजनामा माध्यमिक शिक्षा परीक्षा २०८१ केन्द्राध्यक्ष अभिमुखीकरण कार्यक्रम सोमबार सम्पन्न भएको छ । कार्यक्रममा सहभागि नवीन औद्योगिक कदर बहादुर रीता माविका प्रधानाध्यापक प्रेमबहादुर बस्नेतका अनुसार कार्यक्रममा परिक्षाका तयारीका बारेमा तथा केन्द्राध्यक्षहरुको भुमिकाका बारेमा जानाकारी गराइएको थियो ।

कार्यक्रममा जिल्ला समन्वय समिति रूपन्देहीका प्रमुख उमाकान्त चपाईंले रुपन्देही जिल्लाको २०८० को एसईईको नतिजा सोचेअनुसार नआएकोमा २०८१ मा नतिजा सुधार गर्नेतर्फ विद्यार्थीहरूलाई हौसला बढाउने तर्फ लाग्न सुझाव दिए ।
जिल्ला परीक्षा समन्वय समिति रूपन्देहीका अध्यक्ष एवं रूपन्देहीका प्रमुख जिल्ला अधिकारी वासुदेव घिमिरेले रूपन्देही जिल्ला भौगोलिक, आर्थिक र सामाजिक रुपमा फरक भएकोले परीक्षालाई स्वच्छ ,मर्यादित र व्यवस्थित गर्ने जिम्मेवारी प्राप्त गरेकोमा केन्द्राध्यक्षहरूलाई बधाई दिँदै २०८१ को एसईई मा उत्कृष्ट केन्द्र घोषणा नगर्ने र सबै परीक्षा केन्द्रलाई उत्कृष्ट बनाउन प्रयास गर्ने धारणा व्यक्त गरे ।
शिक्षा विकास तथा समन्वय इकाई रूपन्देहीका इकाई प्रमुख माधव बन्जाडेले परीक्षा केन्द्रको महत्वपूर्ण जिम्मेवारी राज्यको प्राथमिकताको विषय भएकोले सबै केन्द्राध्यक्षहरूले परीक्षालाई व्यवस्थित, मर्यादित र परीक्षा मैत्री बनाउन निर्देशन दिए । कार्यक्रममा सहभागि नवीन औद्योगिक कदर बहादुर रीता माविका प्रधानाध्यापक प्रेमबहादुर बस्नेतका अनुसार कार्यक्रममा शाखा अधिकृत अमर केसीले परीक्षा सञ्चालन तथा व्यवस्थापन सम्बन्धमा प्रस्तुतिकरण गरेका थिए ।
कार्यक्रममा शाखा अधिकृत झविलाल बिक, रूपन्देही लिलाराम न्यौपाने माविका प्रधानाध्यापक रूपकुमार क्षेत्रीले पनि कार्यक्रममा बोलेका थिए ।