बुटवल १५ फागुन ।
राष्ट्रिय प्रजातन्त्र पार्टी (राप्रपा)ले शनिबार फागुन १७ गते बुटवलमा लुम्बिनी प्रदेशस्तरीय बृहत आमसभाको तयारी गरेको छ । ‘अवस्था बदल्न व्यवस्था बदलौं’ भन्ने नारासहित बुटवलमा हुने कार्यक्रमलाई शक्ति प्रदर्शन कै रुपमा लिइएको छ ।
केहीदिन अगाडी पूर्व राजा ज्ञानेन्द्रले मुलुकको निकासका लागि आफूलाई साथ दिन भन्दै सन्देश दिएपछि मुलुकमा राजसस्थाका बारेमा चर्चा चलिरहेको अवस्थामा बुटवलमा सभा हुन लागेको हो ।
राष्ट्रिय प्रजातन्त्र पार्टी (राप्रपा)ले आउँदो शनिबार बुटवलमा गर्न लागेको लुम्बिनी प्रदेशस्तरीय वृहत् आमसभाका बारेमा बिहिवार बुटवलमा राखिएको पत्रकार सम्मेलनमा वोल्दै राप्रपा लुम्बिनी प्रदेश अध्यक्ष प्रदीप उदयले शनिवार बुटवलमा गर्न लागिएको बृहत सभाको तयारीका बारेमा जानाकारी गराए ।
सभामा पार्टीका अध्यक्ष राजेन्द्र लिङ्देन, उपाध्यक्षद्वय विक्रम पाण्डे, ध्रवबहादुर प्रधान, महामन्त्री धवल शमशेर राणा, प्रवक्ता ज्ञानेन्द्र शाही लगायतका नेताले सम्बोधन गर्नेछन् । प्रदेश अध्यक्ष उदयका अनुसार सभा ट्राफिक चोकमा गरिने छ । सभामा ठूलो संख्यामा नागरिकको सहभागिता हुने राप्रपाको दाबी छ ।
पत्रकार सम्मेलनमा राप्रपाका केन्द्रीय सल्लाहकार निरञ्जन थापाले पूर्व राजा ज्ञानेन्द्रले मुलुकको निकासका लागि सन्देश मार्फत मेलमिलापको अवधारणा अगाडी सारेको बताएका छन् । पूर्व मन्त्री समेत रहेका राप्रपाका केन्द्रीय सल्लाहकार थापाले ज्ञानेन्द्रको सन्देशबारेमा आफ्नो बुझाइ राख्दै मुलुकका लागि कसैको ध्यान पुगेन, अब म निकास दिन्छु भन्ने सन्देश ज्ञानेन्द्रको रहेको बताए । प्रजातन्त्र दिवसका अवसरमा यही फागुन ६ गते ज्ञानेन्द्रले भिडिओ मार्फत सन्देश दिएका थिए । सो सन्देशबारेमा थापाले भने, मैले बुझेको राजाको सन्देश यस्तो छ, मुलुक बनाउन कसैको ध्यान पुगेन्, मलाई सहयोग गर्न प¥यो म निकास दिन्छु, कस्तो निकास भन्दा एक किसिमको राष्ट्रिय मेलमिलाप गोलमेच सम्मेलन जस्तो ।
सबैजना मिलेर काम गरौं भन्ने सन्देश ज्ञानेन्द्रको रहेको उनले अर्थाए । अहिले मुलुकमा कानुनहरु दोहोरो मापदण्डमा चलेको, महान्यायाधिबक्ताले एउटै विषयमा पनि कसैलाई मुद्दा चलाउने कसैलाई नचलाउने गर्ने गरेको भन्दै अहिले संविधान नै नभएको जस्तो अवस्था सिर्जना भएको बताए ।