बुटवल १४ चैत ।
लुम्बिनी प्रदेश सरकारले केन्द्र सरकारले दिने बिदाका अतिरिक्त प्रदेश सरकारबाट दिने प्रदेशका लागि २०८२ सालका सार्वजनिक बिदा पनि स्वीकृत गरेको छ । आन्तरिक मामिला तथा कानुन मन्त्रालयको प्रस्ताव अनुसार २०८२ सालका लागि सार्वजनिक बिदा स्वीकृत गरिएको सरकारका प्रवक्ता तथा कृषि, भूमि व्यवस्था तथा सहकारी मन्त्री दिनेश पन्थीले जानकारी दिए । ।
नेपाल सरकारले बर्षभरी दिने सार्वजनिक बिदाका अतिरिक्त प्रदेशका सरकारी कार्यालयहरुमा प्रदेश सरकारले बढीमा ६ दिन अतिरिक्त सार्वजनिक बिदा दिन सकिने व्यवस्था छ । जस अन्तरगत लुम्बिनी प्रदेशले पाँच दिन सार्वजनिक बिदा दिने प्रस्ताव स्वीकृत गरेको हो ।
यी हुन बिदा हुने पर्वहरु
२०८२ भदौ १० गते हरितालिका तीजमा प्रदेश भर बिदा दिने निर्णय गरिएको छ । त्यस्तै माघि तथा माघे सक्रान्तिमा माघ २ गते, बसन्त पञ्चमी (श्रीपञ्चमी) मा माघ ९ गते, प्रदेश स्थापना दिवसमा माघ २१ गते, निश्चित पर्व मनाउने समुदायले पाउने बिदा भुम्या पुजा ( रोल्पा, रुकुम पूर्व, दाङ), वड्का अत्तवारी दाङ, बाके, वर्दिया, कपिलवस्तु, रुपन्देही र नवलपरासी पश्चिम र भगवती जात्रामा पाल्पा जिल्लामा बिदा दिने निर्णय गरिएको छ । प्रदेश सरकारले गरेको यो निर्णय राजपत्रमा प्रकाशित भएपछि लागु हुने छ ।
दलित अधिकार विधेयक तर्जुमा गर्न सहमति
सामाजिक विकास मन्त्रालयले अघि सारेको दलित अधिकार सम्बन्धी विधेयक तर्जुमा गर्न सैद्धान्तिक सहमति प्राप्त गरेको छ । बैठकले लुम्बिनी प्रदेश मानसिक स्वास्थ्य तथा मनोसामाजिक रणनीतिक कार्ययोजना स्वीकृत गर्ने निर्णय गरेको गरेको छ ।
मानसिक स्वास्थ्य रणनीतिक योजना किन ?
लुम्बिनी प्रदेश सरकारले पछिल्लो समय तीव्र रुपमा वृद्धि भइरहेको मानसिक स्वास्थ्य समस्यालाई न्यूनीकरण गर्न मानसिक स्वास्थ्य रणनीतिक योजना स्वीकृत गरेको हो । यो योजना मानसिक स्वास्थ्य सेवा विस्तार, रोकथाम, उपचार र पुनस्र्थापनाका लागि मार्गदर्शन गर्ने उद्देश्यले तयार गरिएको छ । लुम्बिनी प्रदेशमा १३ देखि १७ वर्ष उमेर समूहका ६ दशमलव १ प्रतिशत किशोरकिशोरीहरू मानसिक स्वास्थ्य समस्याबाट ग्रस्त छन् । त्यस्तै, १८ वर्षमाथिका १३ प्रतिशत व्यक्तिले जीवनमा एक पटक मानसिक स्वास्थ्य समस्या भोग्ने सम्भावना रहेको अध्ययनहरूले देखाएका छन् । मानसिक स्वास्थ्य सेवाको पहुँच विस्तार गर्दै स्वास्थ्य केन्द्रहरूमा आवश्यक सेवा प्रवाह गर्ने, मनोसामाजिक परामर्शको प्रभावकारी कार्यान्वयन गर्न विद्यालय, समुदाय र कार्यस्थलमा कार्यक्रम सञ्चालन गर्ने, मानसिक रोगको रोकथाम र सचेतना कार्यक्रम अघि बढाउन मानसिक स्वास्थ्यलाई अन्य सामान्य स्वास्थ्य सेवासँग जोड्ने, आत्महत्या रोकथामका लागि विशेष कार्यक्रम सञ्चालन गर्ने, जसले जोखिममा परेका समूहहरूको पहिचान र सहयोग गर्नेछ । लागू औषध नियन्त्रण र पुनस्र्थापना केन्द्रहरूको सुदृढीकरण गरिने रणनीतिक योजनामा समेटीएको छ ।