काठमाडौ ।
स्वतन्त्र विद्यार्थी युनियन बानेश्वर बहुमुखी क्याम्पसले तीज विशेष कार्यक्रम गरेको छ । पुर्ब सभामुख एवं नेकपा (माओवादी) केन्द्रका स्थायी कमिटी सदस्य ओनसरी घर्ती मगरको प्रमुख आतिथ्यतामा काठमाडौंको बानेश्वर बहुमुखी क्याम्पस , शान्तिनगरमा कार्यक्रम सम्पन्न भएको छ ।
कार्यक्रममा विशेष अतिथिमा क्याम्पस प्रमुख डा. घमानसिंह खड्का, माओवादी केन्द्रका केन्द्रीय सदस्य पन्चा सिंह, अखिल (क्रान्तिकारी) केन्द्रीय अध्यक्ष विजय प्रकाश शर्मा सापकोटा, अखिल (समाजवादी) का अध्यक्ष नरेन्द्र सि लगायत रहेका थिए ।
कार्यक्रममा वोल्दै पूर्व सभामुख मगरले तीज पर्वले सांस्कृतिक एकता, महिला सशक्तीकरण र सामाजिक सद्भावलाई बलियो बनाउन मद्दत गर्ने बताइन् । उनले विद्यार्थी जीवनमा यस्ता सांस्कृतिक गतिविधिले सहकार्य र सकारात्मक सोच प्रवर्द्धन गर्ने पनि उल्लेख गरिन् ।
क्याम्पस प्रमुख घमानसिंह खड्काले स्ववियुले भव्य कार्यक्रम आयोजना गरेकोमा बधाई दिदै यसले विद्यार्थीको नेतृत्व विकास र सांस्कृतिक मूल्यमान्यता जोगाउने कार्यमा महत्वपूर्ण योगदान पुर्‍याएको बताए ।
कार्यक्रममा स्वतन्त्र विद्यार्थी युनियनका अध्यक्ष भुमिराज अधिकारीले सम्पूर्ण सहभागीहरूलाई हरितालिका तीजको शुभकामना व्यक्त गर्दै तीजजस्ता पर्वहरूले मौलिक संस्कृतिलाई जोगाउने मात्र नभई नयाँ पुस्तामा परम्परागत मूल्य–मान्यताको संरक्षण गर्ने अवसर दिने धारणा राखे ।
कार्यक्रममा लुम्बिनी विकास कोषका कार्यकारी सदस्य श्याम रोक्का, विद्यार्थी, प्राध्यापक, कर्मचारी, विभिन्न क्रियाशिल संगठनका अध्यक्ष प्रतिनिधि तथा विभिन्न क्षेत्रका अतिथिहरूको उल्लेखनीय उपस्थिति रहेको थियो। सांस्कृतिक नृत्य, गीत–संगीत र तीज पर्वको महत्वबारेका प्रस्तुतिहरूले कार्यक्रमलाई अझ आकर्षक बनाएका थियो । साथै नृत्य तथा गायनमा सहभागी विद्यार्थीहरुलाई प्रसंसा पत्र प्रदान गरिएको थियो ।

आयोजक स्ववियूले सम्पूर्ण उपस्थित महानुभावहरूलाई धन्यवाद व्यक्त गर्दै आगामी दिनमा पनि यस्ता सांस्कृतिक कार्यक्रमलाई निरन्तरता दिने प्रतिवद्धता जनाएको छ।