बुटवल ।

राष्ट्रिय सभा उपनिर्वाचनमा सत्तागठबन्धनबाट उम्मेदवार बनेका नेकपा एमालेका उम्मेदवार कुमार दसाैदी विजयी भएका छन्।

खसेको कुल मतको मतभार सात हजार नाै सयमध्ये चार हजार २६ मत प्राप्त गरी दसाैदी राष्ट्रिय सभा सदस्यमा विजयी भएको हुन्। दसाैदीले प्रदेशतर्फ २०६४ र स्थानीय तहतर्फ १९६२ गरी जम्मा  चार हजार २६ मतभार प्राप्त गरी विजयी भएका हुन्।

कांग्रेसका उम्मेदवार माधवप्रसाद आचार्यले प्रदेशतर्फ १७७६ र स्थानीय तहतर्फ १९४४ जम्मा ३७२० मत प्राप्त गरेका थिए। नागरिक उन्मुक्ति पार्टीबाट राजेन्द्रवीर रायले एक सय ९२ मतभार प्राप्त गरेको निर्वाचन अधिकृत कृपासुर कार्कीले जानकारी दिए।

प्रदेश सभातर्फ एक सय ४४ मतभार बदर भएको थियो। लुम्बिनी प्रदेशबाट राष्ट्रिय सभा रिक्त एक सदस्य चयन गर्नका भएको मतदानमा प्रदेश सभाका ८७ जना र स्थानीय तहका प्रमुख–उपप्रमुख दुई सय १७ जनाले मतदान गरेका थिए।