लुम्बिनी १० साउन ।
लुम्बिनी बौद्ध विश्वविद्यालयका विद्यार्थीहरु चीनको नानहाई बौद्ध एकडेमी, चीनमा ग्रेजुएट भएका छन् । लुम्बिनी बौद्ध विश्वविद्यालय र नानहाई बौद्ध एकेडेमी चीनबीच दुई जोड दुई (टुप्लस टु) सम्झौता अन्तर्गत विश्वविद्यालयका ३४ जना विद्यार्थी नानहाई अध्ययनका लागि पुगेका थिए ।
स्नातक तहमा ट्राभल एण्ड टुरिजम विषय अध्ययन गरिरहेका विद्यार्थीहरुमध्ये पहिलो पटक ३४ जना विद्यार्थी चीन पुगेका हुन् । उनीहरुले अध्ययन सकेको अवसरमा नानहाईले ग्राजुएसन समारोह आयोजना गरेको थियो । चार वर्षे कोर्ष अन्तर्गत पहिलो चरणमा तीन वर्ष लुम्बिनीमा अध्ययन गरेका विद्यार्थीहरु एक वर्ष अध्ययनका लागि चीनको नानहाई एकेडेमीमा पुगेका हुन् ।
केन्द्रीय क्याम्पस लुम्बिनी र सिटी क्याम्पस बुटवलका विद्यार्थीहरुले दुई सेमेष्टरको कक्षा सकेका छन् । उनीहरुको ग्रेजुएट समारोहमा नानहाईका अध्यक्ष मास्टर इनसुन, लुम्बिनी बौद्ध विश्वविद्यालयका उपकुलपति प्रा.डा. सुबर्णलाल बज्राचार्य, रजिष्ट्रार डा. तिलकराम आचार्यसहितको सहभागिता रहेको थियो ।
नानहाई एकेडेमीमा हरेक वर्ष ४० जना विद्यार्थी अध्ययन गर्न जानेछन् । विश्वविद्यालयले एकेडेमीसँग दुई जोड दुई (टुप्लस टु) सम्झौता गरेसंगै ट्राभल एण्ड टुरिजम विषयमा अध्ययनरत विद्यार्थीहरुले दुई वर्ष लुम्बिनी र दुई वर्ष चीनमा अध्ययन गर्ने विश्वविद्यालयको अन्तर्राष्ट्रिय सम्बन्ध केन्द्रका संयोजक डा. कुमार खड्काले जानकारी दिए ।
चीनमा अध्ययन सकेका विद्यार्थीहरुले लुम्बिनी बौद्धबाट अन्तिम प्रमाणपत्र प्राप्त गर्दैछन् । अध्ययन सकेका अधिकांश विद्यार्थीहरुले रोजगारीका लागि अवसर पाइसकेको खड्काले बताए । कतिपय विद्यार्थीहरुले चीनमै स्नातकोत्तर अध्ययन गर्ने पूर्णछात्रवृत्ति प्राप्त गरेका छन् ।
विश्वविद्यालयले चालु शैक्षिक सत्रमा पनि बुटवल सिटी क्याम्पसमा स्नातक तहमा ट्राभल एण्ड टुरिजम विषयमा भर्ना खोलेको छ । दुई जोड दुई (टुप्लस टु) अन्तर्गत बुटवलमा दुई वर्ष कक्षा सकेपछि थप दुई वर्ष अध्ययन गर्न चीन जानेछन् । अन्तर्राष्ट्रिय विश्वविद्यालयमा अध्ययन गर्दा विद्यार्थीको क्षमतामा बृद्धि देखिएको जनाइएको छ ।
विश्वविद्यालयले कानून तर्फ बीएएलएलबी र भाषातर्फ बिसिटीओएलमा पनि भर्ना खुलाएको छ । बिसिटीओएल पढ्न चाहाने विद्यार्थीहरुका लागि चन्दादाताबाट पूर्ण छात्रवृत्ति व्यवस्था गरिएको जनाइएको छ ।
विद्यार्थी एक्सचेन्ज कार्यक्रम अन्तर्गत चीनको युनान विश्वविद्यालयका विद्यार्थीहरु नेपाली पढ्नका लागि लुम्बिनीमा आउने गरेका छन् । पहिलो ब्याचमा ९ जना विद्यार्थीले एक सेमेष्टर लुम्बिनी पढेर फर्किएका छन् ।
विश्वविद्यालयले विदेशी विद्यार्थी आकर्षित गर्नेगरी छोटो अवधिका शैक्षिक कार्यक्रम पनि शुरु गर्न थालेको छ । बौद्ध अध्ययन संकायमार्फत सर्ट टर्म कोर्ष शुरु गर्न लागिएको डिन डा. माणिकरत्न शाक्यले जानकारी दिए ।
विश्वविद्यालयले मानविकी संकाय अन्तर्गत एक महिनेदेखि छ महिने अवधिका सीप मूलक कार्यक्रम समेत शुरु गरेको छ । समुदायसंग विश्वविद्यालय कार्यक्रम अन्तर्गत हप्पिटालिटी अन्तर्गतका सीपमूलक शैक्षिक कार्यक्रम शुरु गरिएको हो । हाल विश्वविद्यालयमा करिव २१ सय विद्यार्थी अध्ययनरत रहेका छन् ।