बुटवल, ८ चैत ।
बुटवल देविनगरस्थित एन्फा टेक्निकल खेल मैदानमा शनिबारदेखि तिलोत्तमा गोल्डकप फुटबल प्रतियोगिता शुरु हुँदैछ  । खेल मैदानमा शुक्रबार पत्रकार संम्मेलन गदै रुपन्देही जिल्ला फुटबल संघका अध्यक्ष लोक पुनले प्रतियोगिताको सबै तयारी पूरा भएको बताए ।
नेपालकै प्रतिष्ठित गोल्डकपमध्येको एक तिलोत्तमा गोल्डकपमा ८ टिमको सहभागिता रहने आयोजकले जनाएको छ । बुटवल उपमहानगरपालिकाको संरक्षक तथा यशोदा फुड्स प्रालि र त्रिमूर्ति इन्डस्ट्रिज प्रालिको मुख्य प्रायोजनमा प्रदेश खेलकुद परिषद् लुम्बिनी मुख्य सहयोगी संस्था रहेका छन । तिलोत्तमा गोल्डकपको यो २३औँ संस्करण हो।
प्रतियोगिताको उपाधि विजेता टिमले १२ लाख २२ हजार २२२ रुपैयाँ र उपविजेताले ६ लाख ६६ हजार ६६६ रुपैयाँ पुरस्कार पाउनेछ । यसैगरी, उत्कृष्ट गोलरक्षक, डिफेन्डर, मिडफिल्डर, फरवार्ड र कोचलाई ३१ हजार रुपैयाँ तथा सर्वोत्कृष्ट खेलाडीलाई स्कुटर वा मोटरसाइकल प्रदान गरिने आयोजकले जनाएको छ । प्रत्येक खेलका म्यान अफ द म्याचले जनही ११ हजार १११ रुपैयाँ पाउनेछन्।

प्रतियोगितामा आयोजक करेन्ट रूपन्देही–११ सहित संकटा एफसी, मच्छिन्द्र एफसी, चर्च ब्याईज युनाईटेड, नेपाल पुलिस क्लब, नेपाल सशस्त्र प्रहरी बलको एपिएफ क्लब तथा दुई विदेशी टिमहरू एडोर्न गडवाल स्पोर्टिङ क्लब, जर्जियन एफसी गरि आठ टिमको प्रतिस्प्रर्धा गर्ने छन ।