बुटवल ४ साउन ।
नवीन औद्योगिक कदर बहादुर रीता माध्यमिक विद्यालय देवीनगरमा कक्षा ११ विज्ञान, सिभिल इन्जिनियरिङ्ग र कानुन समुहमा अध्ययनरत विद्यार्थीहरुको अभिमुखीकरण कार्यक्रम गरिएको छ ।
आइतवार सम्पन्न कार्यक्रममा राष्ट्रिय परीक्षा वोर्ड लुम्विनी प्रदेश परीक्षा व्यवस्थापन कार्यालय बुटवलका कार्यालय प्रमुख रमाकान्त तिवारीले विद्यालयले विद्यार्थीहरुको समग्र विकासका लागि नेतृत्व, व्यक्तित्व विकास, सामाजिकीकरण र जीवन उपयोगिताका विभिन्न सीपहरु प्रत्येक दिन संचालन गरेर देशको एक उत्कृष्ट नमुना विद्यालय बनाएको बताए । उनले विद्यार्थीहरुले रुची र लक्ष्य अनुसारका विषयहरु छनौट गरी लगनशिल भएर अध्ययन गर्न आग्रह गरे ।
अभिमुखीकरण कार्यक्रममा उत्प्रेणात्मक वक्ता देवदह मेडिकल कलेज देवदहका डाक्टर आविष्कार पराजुलीले विद्यार्थीहरु कसरी प्रभावकारी रुपमा अध्ययन गर्ने, आमा, बुवा र गुरुको महत्व र प्रभावको उच्च सम्मान गर्ने साथी र संगतको कुलतबाट विद्यार्थीहरु जोगिनु पर्नेमा जोड दिए । उनले विद्यार्थी असल बन्ने र विग्रने उमेर यही भएकोले यो उमेरलाई सदुपयोग गर्ने तर्फ लाग्न विद्यार्थीहरुलाई आग्रह गरे ।
कार्यक्रममा विद्यालयका प्रधानाध्यापक प्रेम बहादुर बस्नेतले विद्यालयको समग्र अवस्थाको सम्बन्धमा सहजीकरण गरेका थिए । त्यस्तै विद्यालयका सहायक प्रधानाध्यापक अर्जुन खनालले विद्यार्थी आचारसंहिता २०८२ को बारेमा सहजीकरण गरेका थिए ।
विद्यालयका प्रधानाध्यापक प्रेम बहादुर बस्नेतको अध्यक्षतामा कक्षा १२ विज्ञान समुहकी छात्रा आशिका दाहालको संचालनमा सम्पन्न कार्यक्रममा विज्ञान समूह इन्चार्ज लक्ष्मी नारायण चौधरी, नवीन विद्यार्थी क्लवका अध्यक्ष सुवास पौडेल लगायतले धारणा राखेका थिए ।
कार्यक्रममा महेन्द्र मावि वामीका विद्यालय व्यवस्थापन समितिका अध्यक्ष सन्तोष शाक्य लगायतको सहभागिता रहेको थियो ।
विद्यालयले व्यवस्थापन समूह अन्तरगत होटल व्यवस्थापनमा विशिष्टीकरणका विद्यार्थीहरुको अभिमुखीकरण कार्यक्रम साउन ५ गते बुटवल उपमहानगरपालिका वडा नं. ११ का वडा अध्यक्ष रामचन्द्र क्षेत्रीको प्रमुख आतिथ्यतामा र साउन ६ गते व्यवस्थापन समूह अन्तर्गत कम्प्युटर, वित्तशास्त्र, अर्थशास्त्र, बजारशास्त्र विशिष्टीकरणका विद्यार्थीहरु र शिक्षा समुहका विद्यार्थीहरुको अभिमुखीकरण शिक्षा विकास निर्देशनालय लुम्विनी प्रदेशका निमित्त महानिर्देशक नारायण प्रसाद पोखरेलको प्रमुख आतिथ्यतामा आयोजना हुने विद्यालयले जनाएको छ ।