बुटवल २२ साउन ।
नवीन औद्योगिक कदर बहादुर रीता माध्यमिक विद्यालय देवीनगर बुटवलमा कक्षा १२ मा अध्ययनरत विद्यार्थीहरुले कक्षा ११ मा नव आगन्तुक विद्यार्थीहरुलाई भब्य रुपमा विश्राम वाटिका मणिग्राममा विहिवार स्वागत गरेका छन् ।
कार्यक्रममा बुटवल उपमहानगरपालिका प्रमुख खेलराज पाण्डेयले बुटवलमा शिक्षाको क्षेत्रमा छुट्टै पहिचान बनाएको नवीनले देशका ५८ वटा जिल्लाका विद्यार्थीहरुलाई भर्ना गरेकोमा खुशी व्यक्त गरे । उनले नवीनले शैक्षिक क्षेत्रमा मात्र नभई अनुशासन, खेलकुद, संस्कार, संस्कृति र उद्घोषणकलामा उत्कृष्ट रहेको बताए । नवीनका विद्यार्थीहरुलाई बुटवल उपमहानगरपालिकाले कार्यक्रम संचालनको अवशर दिने प्रतिवद्वता व्यक्त गर्दै नवीनले देशमा नै छुट्टै पहिचान भएको बताउदै यसको उत्पादनले देशको उच्च पदस्थ, कर्मचारी र देश हाक्न सक्ने जनशक्ति निर्माण हुने विश्वास व्यक्त गर्दै उनले सबै विद्यार्थीको उज्वल भविष्यको कामना गरे ।
नवीन विद्यार्थी क्लवका अध्यक्ष तथा सिभिल इन्जिनियरिङ कक्षा १२ का विद्यार्थी सुवास पौडेलको अध्यक्षतामा कानुन समूह कक्षा १२ का विद्यार्थी मनिषा खड्का, हविवा खातुन र विज्ञान समूह कक्षा १२ का विद्यार्थी इशान गैरेको संयुक्त संचालनमा सम्पन्न कार्यक्रममा २०८१ को इसइइ परीक्षामा ४ जिपिए ल्याउन सफल मेधावी विद्यार्थी आर्यन पौडेललाई प्रोत्साहन स्वरूप एकाउन्न हजार नगद, २०८२ को कक्षा १२ को वोर्ड परीक्षामा व्यवस्थापन समुहबाट ३.९४ जिपिए ल्याई नेपालमा द्वितीय र बुटवलमा प्रथम हुन सफल माधव खनालका अभिभावकलाई एक्काइस हजार प्रोत्साहन स्वरूप नगद रकम र विज्ञान समुहबाट ३.९४ जिपिए ल्याउन सफल नेपालमा तृतीय हुन सफल राजु यादवलाई एमविविएस तयारीको लागि विद्यालयबाट अठार हजार र विज्ञान समुहका शिक्षकहरुबाट तेतिस हजार गरी एकाउन्न हजार नगद पुरस्कार बुटवल उपमहानगरपालिकाका प्रमुखले आर्यन पौडेलका बुबा डिल बहादुर पौडेल, आमा कल्पना पौडेल, माधव खनालका दाजु घनश्याम खनाल र राजु यादवकी आमा अमरावती देवी यादबलाई वितरण गरे ।
कार्यक्रममा विद्यालयका प्रधानाध्यापक प्रेम बहादुर बस्नेतले विद्यालयमा ७ वटै प्रदेशका ५८ वटा जिल्लाका विद्यार्थीहरु अध्ययन गर्ने गरेको बताए । उनले यसै वर्षबाट सिनियर डिभिजन तर्फ एनसीसीमा नेपाली सेनाबाट छनौट भएको विद्यालयमा हाल पाँच हजार विद्यार्थी अध्ययन गर्ने गरेको, यसै शैक्षिक सत्रमा कक्षा ११ मा विज्ञान, व्यवस्थापन, सिभिल इन्जिनियरिङ, कानुन र शिक्षा समूहमा बाह्रसय आठ विद्यार्थीहरु भर्ना भएको बताए ।
कार्यक्रममा सहायक प्रधानाध्यापक अर्जुन खनाल, कक्षा १२ व्यवस्थापन समुहका विद्यार्थी सन्तोष के.सी., कानुन समूह कक्षा १२ का विद्यार्थी अमृत बेवारे लगायतले मन्तब्य व्यक्त गरेका थिए । कानुन समुहका विद्यार्थीहरुले रोचक नाटक प्रस्तुत गरेका थिए ।
कक्षा ११ र १२ मा अध्ययनरत विद्यार्थीहरु सांस्कृतिक संयोजक अर्जुन शाहको नेतृत्वमा दर्जनौ रोचक नृत्यहरु प्रस्तुत गरेका थिए ।