बुटवल ।

बुटवलमा आयोजना गरिएको राष्ट्रिय प्राङ्गारिक कृषि मेलाको तयारी अन्तिम चरणमा पुगेको छ । कृषि क्षेत्रको व्यवसायीकरण एवं आधुनिकिकरणमा सहयोग पुर्याउनको लागि बुटवल उद्योग वाणिज्य संघ र लुम्बिनी प्रदेश कृषि तथा भूमि व्यवस्था मन्त्रालयको आयोजनामा बिहिबार देखि बुटवल मण्डपमा राष्ट्रिय प्राङ्गारिक कृषि मेला २०८० गर्न लागिएको हो ।

बुटवल उद्योग वाणिज्य संघले आयोजना गरेको राष्ट्रिय प्राङ्गारिक कृषि मेला सम्पादन समितिले मंगलबार मेला स्थल बुटवल मण्डपमा पत्रकार सम्मेलन गरी मेलाको तयारी पुरा भएको जानकारी गराएको हो । पत्रकार सम्मेलनमा संघका अध्यक्ष तथा मेला सम्पादन समितिका संयोजक हरिप्रसाद अर्यालले  कृषि क्षेत्रको व्यवसायीकरण एवं आधुनिकिकरणमा सहयोग पुर्याउन राष्ट्रिय प्राङ्गारिक कृषि मेला आयोजना गरिएको बताए ।

पाँचदिनसम्म सञ्चालन गरिने मेलामा प्राङ्गारिक कृषिवस्तुको उत्पादन तथा प्रवद्र्धनमा जोड दिईने छ । त्यस्तै उपभोक्तालाई प्राङ्गारिक कृषि, पशुपन्ंछी तथा मत्स्यजन्य पदार्थको बारेमा सचेतना प्रदान गरिने छ । प्राङ्गारिक कृषि प्रणाली तथा असल कृषि अभ्यास पद्धती अपनाउन कृषकहरुलाई जागरुक बनाउने, उपभोक्तामा प्राङ्गारिक कृषि उपज तथा असल खेती अभ्यास बारे जानकारी गराउने विश्वास गरिएको छ ।

कृषिको उत्पादन लागत घटाउन आधुनिक कृषि प्रविधि, कृषि औजार र मेशिनरी सम्बन्धी जानकारी गराईने छ । असल कृषि प्रणाली अपनाइ कृषि, पशुपन्छी तथा मत्स्यजन्य बस्तु उत्पादन एवं बजारीकरणमा सहयोग पुर्याउने पनि विश्वास गरिएको अर्यालले बताए ।

उनका अनुसार कृषिमा आधारित उद्योगमा लगानी आकर्षित गर्ने तथा निर्यात योग्य वस्तुहरुको पहिचान र प्रवद्र्घन, कृषि, पशुपन्छी तथा मत्स्यजन्य उत्पादन भण्डारण तथा बिक्री बितरणमा भएका उपलब्धीको जानकारी गराईने छ ।

निःशुल्क प्रवेशको व्यवस्था गरिएको मेलामा कृषिका अत्याधुनिक प्रबिधिको प्रदर्शनी, कृषि परिकार, उत्कृष्ट कृषि उत्पादनको प्रदर्शन, कृषि सेवा सम्बन्धि जानकारीमुलक स्टल, प्राङ्गारिक र असल खेती अभ्यास, कृषिजन्य बस्तुको विक्रि वितरण, जिवनाशक विषादि प्रयोग प्रभाव र विकल्प, प्राङ्गारिक खेतीको लागि हालसम्मको प्रयास र उपलब्धी, मत्स्यपालन व्यवसाय, अवसर सम्भावना र चुनौती तथा कृषि बस्तुको बजारीकरण सम्बन्धि अन्तरक्रिया तथा छलफल गरिने छ । त्यस्तै कृषिसंग सम्बन्धित प्रतियोगिताहरु र कृषिसंग सम्बन्धित सांस्कृति सांगितक कार्यक्रम प्रस्तुत गरिने छ ।

त्यस्तै मेलामा मोटो परीक्षण तथा बाली परीक्षण शिविर सञ्चालन गरिने छ । किसानका लागि यी दुई शिविरलाई विशेष प्राथमिकता दिईएको संघका महासचिव तथा मेला सम्पादन समितिका सदस्य सचिव मुक्तिप्रसाद अधिकारीले जानकारी गराए । गैरनाफामुलक रुपमा आयोजना गरिएको मेलामा करिव एक सय स्टल रहने र २० हजारले अवलोकन गर्ने अपेक्षा लिईएको आयोजकले बताएका छन्  । पत्रकार सम्मेलनमा नेपाल पत्रकार महासंघ रुपन्देहीको उपाध्यक्ष विश्वास ढकाल, नेपाल पत्रकार महासंघ रुपन्देहीका पूर्वअध्यक्ष वालकृष्ण चापागाईले मेलालाई उपलब्धिमुलक बनाउन सुझाव दिँदै पत्रकारिताको क्षेत्रबाट पूर्ण साथ र सहयोग रहने प्रतिवद्धता व्यक्त गरेका थिए  ।