मानवलाई सडकमा आउन नपर्नेगरी भूमिका बढाउन जरुरी छः मुख्यमन्त्री आचार्य
देउखुरी, १८ पुस ।
लुम्बिनी प्रदेशका मुख्यमन्त्री चेतनारायण आचार्यले निलसागर सेवा आश्रमको नव निर्मित भवनको उद्घाटन गरेका छन् । राप्ती गाउँपालिका–८ मिलनडाँडामा सहयोगापेक्षीहरुको लागि नव निर्मित भवनको बिहिवार उद्घाटन गरे । उद्घाटन कार्यक्रमलाई सम्वोधन गर्दै उनले मानवलाई सडकमा आउन नपर्नेगरी घरपरिवार, समाज र राज्यले भूमिका निर्वाह गर्न आवश्यक रहेको बताए। अमानवीय व्यवहारका कारण मानिसलाई घरबाट सडकमा पु¥याएको उल्लेख गर्दै उनले यसखाले समस्या समाधान गर्न चेतना अभिवृद्धिको अभियानलाई व्यापक बनाउन प्रदेश सरकारले साझेदारी गर्ने बताए । संविधानले हरेक नागरिकलाई सम्मानपूर्वक बाच्न पाउने अधिकार सुनिश्चित गरेको र त्यसको कार्यान्वयन गर्ने दायित्व राज्यको भएको उनले बताए ।‘संविधानले हरेक नागरिकलाई सम्मानपूर्वक बाच्न पाउने अधिकार सुनिश्चित गरेको छ । यसलाई कार्यान्वयन गर्ने जिम्मेवारी तीन तहकै सरकारको हो । हामिले त्यो जिम्मेवारी निर्वाह गर्छौं’मुख्यमन्त्री आचार्यले भने,‘प्रदेशलाई सडक मानव मुक्त बनाउने अभियानलाई निर्णायक बनाउन सबैको साथ सहयोगको खाँचो छ ।’
सरकार सबैको हो भन्ने महशुस गराउनेगरी काम भइरहेको, मानव कल्याणकोलागि निलसागर आश्रमले गरेको कामको उदाहरणीय भएको चर्चा गर्दै उनले आश्रममा स्वास्थ्यकर्मीको व्यवस्थापनकालागि प्रदेश सरकारले ध्यान दिने प्रतिबद्धता व्यक्त गरे । आश्रमको नाममा बाँकेमा जग्गा प्राप्ती भएको खण्डमा भवन निर्माणकोलागि प्रदेश सरकारले साझेदारी गर्ने समेत उनले विश्वास दिलाए । घर परिवारमा मनाउने उत्सवहरु समेत आश्रममा पुगेर मनाउन मुख्यमन्त्री आाचर्यले आह्वान समेत गरे। राप्ती गाउँपालिकाले भवन उद्घाटन कार्यक्रम आयोजना गरेको थियो ।
कार्यक्रममा सभामुख तुलाराम घर्तीमगरले सम्मानपूर्वक बाच्न पाउने अधिकारलाई सुनिश्चित गर्ने जिम्मेवारी तीन तहकै सरकारको भएको बताए । कानूनी जटिलता फुकाउदै मानव कल्याणका कामहरुलाई अघि बढाउन जरुरी रहेकोमा उनले जोड दिए। सामाजिक विकास मन्त्री जन्मजय तिमिल्सिनाले संविधानले सुनिश्चित गरेका अधिकारलाई जनताले महशुस गर्नेगरी कार्यान्वयन प्रदेश सरकारले गरिरहेको बताए। प्रदेश सभा सदस्य इन्द्रजीत थारुले सामाजिक न्याय र सामाजिक सुरक्षाको प्रत्याभूती दिलाउने जिम्मेवारी राज्यको भएको बताए । निलसागर सेवा आश्रमका संस्थापक अध्यक्ष सरिता खनालले मानव सेवाकालागि राज्य तहबाट सहयोग र सहकार्य हुदा अभियानले थप व्यापकता पाउने बताइन्। पालिका अध्यक्ष प्रकाश बिष्टको अध्यक्षतामा कार्यक्रम सम्पन्न भएको हो ।