२०८१ चैत्र २२

२३औँ संस्करणको तिलोत्तमा गोल्डकप ९ चैतदेखि
  • लुम्बिनी खोज
  • २०८१ फाल्गुन २६, सोमबार ११:१८ गते

तिलोत्तमा गोल्डकप फुटबल प्रतियोगिता चैतको ९ गतेदेखि सुरु हुने भएको छ। आइतबार बुटवलमा पत्रकार सम्मेलन गरी आयोजक रुपन्देही जिल्ला फुटबल संघका अध्यक्ष लोक पुनले प्रतियोगिताको तयारी पूरा भएको जानकारी दिए।

नेपालकै प्रतिष्ठित गोल्डकपमध्येको एक तिलोत्तमा गोल्डकपमा ८ टिमको सहभागिता रहने आयोजकले जनाएको छ। बुटवल उपमहानगरपालिकाको संरक्षक तथा यशोदा फुड्स प्रालि र त्रिमूर्ति इन्डस्ट्रिज प्रालिको मुख्य प्रायोजनमा प्रदेश खेलकुद परिषद् लुम्बिनी मुख्य सहयोगी संस्था रहेका छन्। तिलोत्तमा गोल्डकपको यो २३औँ संस्करण हो।

प्रतियोगिताको उपाधि विजेता टिमले १२ लाख २२ हजार २२२ रुपैयाँ र उपविजेताले ६ लाख ६६ हजार ६६६ रुपैयाँ पुरस्कार पाउनेछ। यसैगरी, उत्कृष्ट गोलरक्षक, डिफेन्डर, मिडफिल्डर, फरवार्ड र कोचलाई ३१ हजार रुपैयाँ तथा सर्वोत्कृष्ट खेलाडीलाई स्कुटर वा मोटरसाइकल प्रदान गरिने आयोजकले जनाएको छ। प्रत्येक खेलका म्यान अफ द म्याचले जनही ११ हजार १११ रुपैयाँ पाउनेछन्।

यो वर्ष डिफेन्डिङ च्याम्पियन मनाङ मर्स्याङ्दी क्लब सहभागी नहुने भएको छ। प्रतियोगितामा रुपन्देही–११, संकटा एफसी, मच्छिन्द्र एफसी, चर्च ब्याइज क्लब, थ्री स्टार क्लब, नेपाल आर्मी क्लब, नेपाल पुलिस क्लब, एपिएफ क्लब, एडोर्न गडवाल स्पोर्टिङ क्लब र उज्वेकिस्तानको टिमलाई सहभागिताका लागि पत्राचार गरिएको छ।