बुटवल १३ चैत ।
अर्घाखाँचीमा आज भएको सवारी दुर्घटनामा परी चार जनाको मृत्यु भएको छ । गोरुसिंगे–संन्धिखर्क सडकखण्डअन्तर्गत अर्घाखाँची शितगंगा नगरपालिका–२ भुवन पाटामा लु२ख ३०३ नम्बरको बस दुर्घटना भएको हो ।
नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय बुटवलका प्रहरी निरीक्षक ईश्वरी अधिकारीका अनुसार सुपा देउराली मन्दिर दर्शन गरी नवलपरासी फर्कने क्रममा दुर्घटना भएको हो । बुधवार साँझ करिब पौने ६ बजेतिर दुर्घटना भएको प्रहरीले जनाएको छ । बस सडकदेखि करिब २५ मिटर तल खसेको प्रहरीको भनाइ छ।

दुर्घटनामा मृत्यु हुनेहरूमा बुटवल–८ बस्ने ५५ वर्षीया जमुना बस्याल, नवलपरासी पश्चिम भुमही बस्ने अन्दाजी ४५–५० वर्षीया उमा न्यौपाने, निजकी सासु (नामथर नखुलेकी) र नवलपरासी बर्दघाटका मदनकुमार विक रहेका छन् । विक बसका चालक रहेको प्रहरीले जनाएको छ । दुर्घटनापछि उनीहरूलाई प्राथमिक स्वास्थ्य केन्द्र ठाडा पठाइएको थियो । त्यहाँ चिकित्सकले मृत्य घोषणा गरेका थिए ।

दुर्घटनामा घाइते हुनेहरूमा नवलपरासी बर्दघाट–१२ का सन्तोष कडेल, अमर कडेल, आशिष अधिकारी, लक्ष्मी अधिकारी, आन्दा अधिकारी, आयान्स अधिकारीलाई बुटवल रिफर गरिएको छ ।

यस्तै, बर्दघाट–१२ कै अरुण भट्टराई, चन्द्रकला भट्टराई, रुपन्देही देवदहका सक्षम चापागाईलगायत घाइते भएका छन् । घाइतेहरूलाई तत्काल उपचारका लागि प्राथमिक स्वास्थ्य केन्द्र ठाडा लगिएको थियो । त्यहाँबाट गम्भीर घाइतेलाई रिफर गरिएको थियो ।