बुटवल १७ चैत ।
नवीन औद्योगिक कदर बहादुर रीता माध्यमिक विद्यालयमा कक्षा ११ ले कक्षा १२ मा अध्ययन गर्ने विद्यार्थीहरुलाई शान्तिका अग्रदुत गौतम बुद्धको जन्मभुमि लुम्बिनी स्थीत लुम्विनी अन्तराष्ट्रिय सम्मेलन तथा मेडिटेशन हलमा आइतवार विदाइ तथा शुभकामना कार्यक्रम गरेको छ ।
कार्यक्रममा बुटवल उपमहानगरपालिकाका प्रमुख खेलराज पाण्डेयले विद्यालयले संचालन गरेका हरेक गतिविधिले समग्र बुटवलको गौरव बढाएकोमा खुशी व्यक्त गर्दै साँस्कृतिक, संस्कार, कला लगायतका विभिन्न विद्यामा विद्यालयले गर्व गर्न सक्ने शिर ठाडो बनाएर हिड्न सक्ने बनाएकोमा खुशी व्यक्त गरे । उनले बुटवल उपमहानगरपालिकाले भूगोल, संस्कृति, पर्यटन र सीप समेतलाई जोडेर शिक्षा तथा संस्कृति विकास गर्न बुटवल उपमहानगरपालिका लागि परेको बताए ।

लुम्विनी विकास कोषका कोषाध्यक्ष शिद्विचरण भट्टराईले नवीनले छुट्टै किसिमले फरक पहिचान बनाएकोमा विद्यालयको र शैक्षिक इतिहासमा थप उचाई प्राप्त गर्ने आशा व्यक्त गर्दै अन्तराष्ट्रिय बौद्व सम्मेलन तथा मेडीटेशन हल लुम्विनीमा विदाई तथा शुभकामना कार्यक्रम आयोजना गर्ने पहिलो विद्यालय हुन सफल भएकोमा विद्यालय परिवारलाई धन्यवाद समेत दिए ।
शिक्षा विकास तथा समन्वय इकाई रुपन्देहीका इकाइ प्रमुख माधव बन्जाडेले विद्यालयले मुलुक भरी नै आफ्नो विशिष्टता प्राप्त गरेको नेपालमा ठुलो विद्यालयको सुचिमा पाँचौं नम्बरमा पर्न सफल हुनुका साथै शिक्षण सिकाइका अतिरिक्त जीवन संग जोडिएका सवालमा सामाजिक नेतृत्व सीप र संस्कारयुक्त शिक्षा दिइएकोमा खुशी ब्यक्त गर्दै नवीनले गर्दा रुपन्देही जिल्लाको इज्जत बढेको बताए ।
बुटवल उपमहानगरपालिका वडा नं. ११ का वडा अध्यक्ष रामचन्द्र क्षेत्री, विद्यालयका प्रधानाध्यापक प्रेम बहादुर बस्नेत, स.प्र.अ. अर्जुन खनाल, कक्षा ११ की छात्रा हिरा सुनार, कक्षा १२ का रोशन परियार लगायतले धारणा व्यक्त गरेका थिए ।
नवीन विद्यार्थी क्लवका अध्यक्ष सुवास पौडेलको अध्यक्षता कक्षा ११ विज्ञान समूहकी छात्रा एलिजा रेग्मी, रक्षा भट्टराई र प्रिया आलेको संचालनमा सम्पन्न कार्यक्रममा कक्षा ११ र १२ का विद्यार्थीहरुले सांस्कृतिक संयोजक अर्जुन शाहको नेतृत्वमा रोचक सांस्कृतिक नृत्य प्रस्तुत गरेका थिए ।
विद्यालयले लुम्विनीमा रहेको अन्तराष्ट्रिय बौद्व सम्मेलन तथा मेडिटेशन हल लुम्विनीमा विदाई तथा शुभकामना कार्यक्रम गरेर स्थानीय आन्तरिक पर्यटन प्रवर्द्वन गर्नुका अतिरिक्त विद्यार्थीहरुको नेतृत्व, व्यक्तित्व विकास र संस्कारको विकासमा टेवा पुग्ने उद्वेश्यले बुटवलमा कार्यक्रम सम्पन्न गर्न विद्यार्थी संख्याको आधारमा पूर्वाधार नभएकोले कार्यक्रम लुम्विनीमा गरिएको विद्यालयका प्रधानाध्यापक प्रेम बहादुर बस्नेतले बताए ।
विद्यालयमा कक्षा ११ र १२ विज्ञान, व्यवस्थापन, सिभिल इन्जिनियरिङ, कानुन र शिक्षा समुहमा २०६९ विद्यार्थीहरु अध्ययनरत छन् भने मन्टेश्वरी देखि कक्षा १२ सम्म ४७०२ विद्यार्थीहरु रहेका छन् ।
बुटवल उपमहनागरपलिकाले हालै विद्यालय तथा संघ संस्थाहरुका औपचारिक कार्यक्रममा ७ जना भन्दा बढीलाई मन्चमा आसन ग्रहण नगर्ने निर्देशन अनुसार कार्यक्रमका अध्यक्ष नवीन विद्यार्थी क्लवका अध्यक्ष सुवास पौडेल, प्रमुख अतिथि बुटवल उपमहनागरपलिकाका प्रमुख खेलराज पाण्डेय, विशिष्ट अतिथिहरु लुम्विनी साँस्कृतिक नगरपालिका नगर प्रमुख सजरुद्दिन मुसलमान, लुम्विनी विकास कोषका कोषाध्यक्ष सिद्विचरण भट्टराई, शिक्षा विकास तथा समन्वय इकाइ रुपन्देहीका इकाइ प्रमुख माधव बन्जाडे, पश्चिम नेपाल बस व्यवसायी संघका अध्यक्ष दधिराम खरेल र वडा नं ११ का वडा अध्यक्ष एवं विद्यालयका संरक्षक रामचन्द्र क्षेत्रीलाई विशिष्ट अतिथिको रुपमा मन्चमा आसन ग्रहण गरेर उपमहानगरपालिकाको निर्देशन विद्यालयले पूर्ण कार्यान्वन गरेको प्रधानाध्यापक बस्नेतले बताए ।