बुटवल १३ मंसिर ।
शुभयात्रा नेपाल रूपन्देहीले आयोजना गरेको तिलोत्तमा नगरस्तरीय असल नेतृत्व वक्तृत्वकला प्रतियोगिताको छनौट चरण अन्तर्गत वडानम्बर ३ को छनौट कार्यक्रम आज (शनिबार) सम्पन्न भएको छ । नगरभित्र बसोबास गर्ने सत्र वटै वडाका मा.वि. तहका विद्यार्थीबीच “असल नेतृत्वमा आधारित” प्रतिस्पर्धा गराउन गत कार्तिक २९ गते वडानम्बर १ बाट प्रारम्भिक प्रशिक्षण सहितको छनौट कार्यक्रम शुरू गरिएको संस्थाका जिल्ला अध्यक्ष मुक्तिनाथ गैह्रेले जानकारी दिए ।

तालिम सहितको प्रतियोगिता उद्घाटन गर्दै तिलोत्तमा नगरपालिकाका कार्यपालिका सदस्य लक्ष्मीले आफ्ना वडाका किशोर–किशोरीका राय बुझ्न पाइने कार्यक्रम सञ्चालन भएको भन्दै खुशी व्यक्त गरिन । त्यस्तै तिलोत्तमा – ३ का वडासचिव गोकूल गिरिले वडा र नगरपालिकालाई सहयोग पुग्ने कार्यक्रम सञ्चालन गरेकोमा धन्यवाद दिए ।
शुभयात्रा नेपाल जानकीध्यान समितिका संयोजक भगवता बेल्बासेको अध्यक्षतामा भएको उद्घाटन कार्यक्रममा बोल्दै संस्थाका केन्द्रीय अध्यक्ष मधुसुदन गैह्रेले पञ्चसूत्रीय योजना सँगै अन्य रचनात्मक क्रियाकलापमा संस्था गतिशील भएको बताए । उनले नेपालका ३ वटा देवभूमिक्षेत्र, ७ वटा गौ–चरण क्षेत्र, क्यान्सर अस्पताल, फोहरमुक्त नेपाल र पर्यटनका पञ्चसूत्रीय योजनामा शुभयात्रा नेपाल केन्द्रित भएको जानकारी दिए ।
कार्यक्रममा, संस्थाका जिल्ला अध्यक्ष एवम् विश्व वक्तृत्वकला प्रतियोगितामा सान्त्वना भएका जेसीजका अन्तर्राष्ट्रिय सहजकर्ता मुक्तिनाथ गैह्रेले सहभागीलाई प्रतियोगिता अघि प्रशिक्षण समेत दिएका थिए । त्यसैगरी, प्रतियोगिताको प्रस्तुतिपश्चात् मौखिक र लिखित रूपमा सबै सहभागीलाई सुझाव समेत दिइएको निर्णायक मण्डलका संयोजक विज्ञान घिमिरेले जानकारी दिए ।
प्रारम्भिक प्रशिक्षण एवम् छनौट प्रतियोगितामा पहिलो हुँदै स्मृति बोर्डिङ् स्कूलका आयुष गौतम नगरस्तरीय अन्तिम प्रतियोगितामा प्रवेश गरेका छन् । प्रतियोगितामा दोस्रो हुँदै बुटवल पब्लिक स्कूलका मंजिल अर्याल र तेस्रो स्मृति बोर्डिङ् स्कूलका विपना विष्टले पुरस्कार प्राप्त गरेका छन् ।
निर्णायकहरू स्थानेश्वर बस्याल, वेदप्रसाद न्यौपाने, बुटवल पब्लिक स्कूलका सहायक प्रधानाध्यापक रामचन्द्र पौडेल र स्मृति बोर्डिङ् स्कूलका उद्धव पौडेल लगायतले कार्यक्रमका बारेमा चर्चा गरेका थिए ।
कार्यक्रम तिलोत्तमा ३ को वडा कार्यालय परिसरस्थित दुर्गामन्दिर हलमा आयोजित कार्यक्रम शुभयात्रा नेपालका सदस्य डुमा कुमारी न्यौपानेको सञ्चालन तथा पार्वती काफ्लेको स्वागतमा भएको थियो ।
नगरका सत्रवटै वडाका प्रारम्भिक चरणपछि अन्तिम प्रतिस्पर्धा गराइने संस्थाका कार्यालय सहायक खिमकुमारी बस्यालले जानकारी दिइन् । आगामी मंसिर १८ गते वडानम्बर –४ मा बसोबास गर्ने विद्यार्थीबीच र मंसीर २० गते वडानम्बर ५ मा बसोबास गर्ने विद्यार्थीबीच छनौट प्रतियोगिता हुने जनाइएको छ ।