बुटवल २८ माघ ।
रुपन्देहीका उद्योगी व्यवसायीहरुले आगामी आर्थिक वर्ष ०८२।०८३ को बजेटमा उद्योग क्षेत्र सुधारका लागि गरिनुपर्ने विषयहरुलाई सुझावका रुपमा समेट्न नेपाल उद्योग परिसंघमार्फत सरकारलाई आग्रह गरेका छन् । सरकारले आगामी बजेटका समेट्नुपर्ने विषयमा परिसंघले सुझाव माग गरेपछि प्रदेश र जिल्ला तहमा रहेका उद्योगी व्यवसायीहरु ले विभिन्न सुझाव दिएका छन् । उद्योगी ब्यवसायी समक्ष सुझाव लिने क्रममा सोमबार रुपन्देहीमा छलफल गरिएकोे हो ।
कार्यक्रममा सहभागी उद्योगीहरुले अनुत्पादक क्षेत्रमा लगानी बढाएर उत्पादनमूलक उद्योग प्राथमिकतामा नपारेको, चर्को ब्याज दरका कारण धरासायी भएको, सिंगो ब्यवस्था नै उद्योगमैत्री नरहेको र कर्जा भुक्तानीमा पनि समस्या रहेको बताए । उनीहरुले बैंक तथा वित्तीय संस्थाहरुले कम्तिमा ६० प्रतिशत लगानी उत्पादनमुलक क्षेत्रमा गर्नुपर्ने, महिला सुविधा कर्जा, युवा उद्यमशिलता कर्जा, पुनकर्जाजस्ता कर्जाहरु विशेष गरी उत्पादनशील क्षेत्रमा प्राथमिकता दिनुपर्ने, उद्योग क्षेत्रमा गरिने ऋण लगानीको ब्याजदर १ अंकीय हुनुपर्ने कुरा राखे । त्यस्तै उद्योगमा गरिने लगानीको ब्याजदर बेस रेटको आधारमा कायम गर्नुपर्ने, उद्योगीहरुले एलसी खोल्दा बखत राख्नुपर्ने १० प्रतिशतसम्म मार्जिन नगद रकम बिना ब्याज बैंकमा राख्नुपर्ने व्यवस्था अन्यायपूर्ण रहेको भन्दै हटाउनुपर्ने कुरा पनि राखे । उद्योगीको रकम होल्ड गरिने र सो रकम कर्जाबाट होल्ड भएमा उद्योगीले ब्याज तिर्नुपर्ने व्यवस्था व्यवहारिक नभएकाले हटाउनुपर्ने उनीहरुको भनाइ छ । एलसीवापत जम्मा हुने रकम कर्जा वा बचत खातामा होल्ड गर्ने व्यवस्था गर्नुपर्ने तथा हालको विषम परिस्थितिलाई मध्यनजर गरी उद्योगहरुको विक्री क्षमता बृद्धि गर्न बैंकहरुले सरल रुपमा कर्जा प्रवाह गरी कर्जा भुक्तानीको समय सिमा स्वतः बृद्धि गर्दै लगेर चालु पूँजी कर्जा तत्काल लागू गर्न नहुने व्यवस्था समेट्न पहल गर्न आग्रह गरेका छन् । अग्रिम आयकर, खुल्ला भन्सार, गैरकानुनी ढंगबाट हुने गरेका औद्योगिक गतिविधिहरुले उद्योगीहरुलाई संकटतर्फ धकेलेको उद्योगीहरुले गुनासो गरे ।
स्थानीय उद्योगी आत्मनिर्भर भए मात्रै स्थानीय अर्थतन्त्रको निर्माण हुने विषयमा ध्यान दिन उनीहरुको आग्रह छ । पूर्वाधार एवं नीतिगत सुधार गरेर अहिले भएका भन्सार नीति उद्योगीमैत्री बनाउन पहल गर्न उनीहरुले परिसंघका प्रतिनिधिलाई आग्रह गरेका हुन ।
कार्यक्रममा रुपन्देही उद्योग संघका अध्यक्ष दिलिप सापकोटाले उद्योगीहरुले स्वदेशी लगानी बृद्धि हुँदा राष्ट्रिय अर्थतन्त्र मजबुद हुने हुदा लगानीको वातावरण तर्फ ध्यान दिनुपर्ने धारणा राखे ।
परिसंघका लुम्विनी प्रदेशका उपाध्यक्ष राम प्रसाद बस्यालले आगामी बजेट मार्फत नेपाल सरकार र सम्वन्धित निकायलाई सुझाव दिनका लागि कार्यक्रम आयोजना गरिएको भन्दै कार्यक्रमबाट उठेका सवै विषयहरु सम्वन्धित निकायमा पु¥याउने प्रतिवद्धता जनाए । आ– आफनो उद्योगको समस्या बारेमा उद्योगीहरु चन्द्रमान श्रेष्ठ, उपेन्द्र अग्रवाल, लिल बहादुर कार्की, निश्चल शर्मा, मेघराज भण्डारी, राजकुमार श्रेष्ठ, सुर्यबहादुर कार्की, कुसुम खनाललगायतले सुझाव राखेका थिए । उद्योग संघका प्रमुख कार्यकारी अधिकृत यादव भण्डारीका अनुसार कार्यक्रममा संघका संघका द्धितिय उपाध्यक्ष हरी वहादुर खत्रि, महासचिव हिरामणी भट्टराइ, कार्य समिति सदस्य रमेश प्रसाद आचार्य, राजु घिमिरे ,दिलु शाहीले उद्योगहरुलाई सहज बातावरणमा संचालन गर्न साना उद्योगीहरुको भावनालाई समेत समेटनु पर्नेमा जोड दिएका थिए ।
कार्यक्रममा नेपाल उद्योग परिसंघ काठमाडौंका निर्देशक राजिव मजगैंया, हिमाल पौडेल संघका संस्थागत अध्यक्षहरु, वस्तुुगत समितिका संयोजकहरु, सदस्य उद्योगीहरुको सहभागिता रहेको थियो ।