बुटवल ७ मंसिर ।
रुपन्देही जिल्ला फुटबल सङ्घको आयोजनामा अखिल नेपाल फुटबल सङ्घको वार्षिक कार्यक्रम अन्तर्गत रूपन्देही जिल्ला स्तरीय १४ वर्ष मुनिका विद्यार्थीहरूको अन्तरविद्यालय फुटबल प्रतियोगिता २०२५ को समापन आइतबार भएको छ।
छात्रतर्फको फुटबल प्रतियोगितामा नवीन औद्योगिक कदरबहादुर रीता माविले न्यू होराइजन बोर्डिङ स्कुललाई सात गोल गरी विजेता बन्न सफल भएको छ भने न्यू होराइजन बोर्डिङ स्कुलले कुनै पनि गोल गर्न सकेन। छात्रातर्फको फुटबल खेलमा कुँवरवर्ती बोर्डिङ स्कुल तिलोतमाले सिद्धार्थ बोर्डिङ स्कुल तिलोतमलाई एकका विरुद्ध तीन गोल गरी विजेता बन्न सफल भएको छ ।
उक्त अवसरमा अखिल नेपाल फुटबल सङ्घका केन्द्रीय उपाध्यक्ष दीर्घबहादुर केसी कुमारले विजेता र उपविजेता विद्यालयहरू र विद्यार्थीहरूलाई सिल्ड ,प्रमाणपत्र ,चेक र नगद वितरण गर्नुभएको थियो।
गत वर्ष मकवानपुर जिल्लामा बाढी तथा पहिरोबाट दिवंगत भएका अखिल नेपाल फुटबल सङ्घका विद्यार्थी खेलाडीहरू अनुपमा घलान आदित्य बलमपाकी दिवस बानिया प्रियंस आचार्य विकल रेग्मी सिमन योन्जनको स्मृतिमा फुटबल प्रतियोगिता आयोजना गरिएको थियो।
रुपन्देही जिल्ला फुटबल सङ्घका अध्यक्ष लोक पुनको अध्यक्षतामा रवि रानाको सञ्चालनमा सम्पन्न कार्यक्रममा एन्फाका डाइरेक्टर बुद्धि गुरुङ रुपन्देही जिल्ला फुटबल संघका पदाधिकारी हरू लगायतको सहभागिता रहेको थियो। छात्रतर्फको फुटबल विजेता बन्न सफल नवीन औद्योगिक कदर बहादुर रिता माविले नगद रु ४० हजार प्राप्त गर्न सफल भएको विद्यालयका प्रधानाध्यापक प्रेम बहादुर बस्नेतले बताए ।