कपिलवस्तु ११ मंसिर ।
कपिलवस्तुको बाणगंगा नगरपालिका– ४, जितपुरमा स्थापित सहकारी बजार तथा कोसेली घर बुधबारदेखि औपचारिक रूपमा सञ्चालनमा आएको छ । स्थानीय उत्पादनलाई सुरक्षित, सरल र उचित मूल्यमा उपभोक्तासामु पुर्‍याउने उद्देश्यसहित सिनर्जी बहुउद्देश्यीय सहकारी संस्थाले सञ्चालनमा ल्याएको यो केन्द्र ग्रामीण बजार व्यवस्थापनको महत्त्वपूर्ण आधारका रूपमा देखिन थालेको बताइएको छ ।
सहकारी बजार तथा कोसेली घर लुम्बिनी प्रदेश सभा सदस्य विष्णु पन्थी र बाणगंगा नगरपालिकाका मेयर चक्रपाणि अर्यालले संयुक्त रूपमा उद्घाटन गरी सञ्चालनमा ल्याइएको छ । उक्त उद्घाटन कार्यक्रममा बोल्दै प्रदेश सांसद विष्णु पन्थीले सहकारी बजारले स्थानीय किसान, घरेलु तथा साना उद्यमीहरूको उत्पादनलाई प्राथमिकतामा राख्दै प्रवर्द्धन गर्ने विश्वास व्यक्त गरेका छन् ।
‘प्रदेश सरकारले जैविक मल कार्यक्रममार्फत सहकारीलाई ३० लाख रुपैयाँ सहयोग गरेको छ । अब किसानले विषादीरहित, सुरक्षित तथा जैविक उत्पादनतर्फ उन्मुख हुनुपर्छ,’ पन्थीले भने, ‘कोसेली घरजस्तो संरचनाले किसानदेखि साना उद्योगसम्मलाई बजारसँग जोड्ने प्रभावकारी भूमिका खेल्ने पन्थीको भनाइ छ ।
मेयर चक्रपाणि अर्यालले बाणगंगा नगरपालिकाले स्थानीय उत्पादन र उद्यमशीलता विस्तारका कार्यक्रमलाई विशेष प्राथमिकता दिँदै आएको उल्लेख गरेका छन् । ‘किसान र साना उद्यमीहरूको मागअनुसार थप कार्यक्रम ल्याउने योजनामा नगरपालिका लागिपरेको बताउँदै सहकारी बजार र कोसेली घरमार्फत महिला समूह र स्थानीय उत्पादनकर्ताले तयार पारेका वस्तु सहज रूपमा बजारमा पुर्‍याउन सहयोग हुनेछ,’ मेयर अर्यालले बताए।
सिनर्जी बहुउद्देश्यीय सहकारीका अध्यक्ष लक्ष्मण बेल्बासेले सहकारी बजार स्थानीय उत्पादनको पहिचान, संरक्षण र प्रवर्द्धनका लागि प्रभावकारी माध्यम बन्ने बताएका छन् । ‘तरकारी, फलफूल, अन्न, मह, घरेलु उत्पादन, हस्तकलालगायतका सामग्रीलाई किसान र महिला समूहबाट संकलन गरी सिधै बजारमा पुर्‍याइनेछ,’ उनले भने, ‘सहकारी सदस्यहरूलाई सामान किन्दा १० प्रतिशतसम्म छुटको व्यवस्थासमेत गरिएको छ ।’