बुटवल ५ पुस ।
बुटवलको औद्योगिक व्यापार मेलामा ‘व्यूटि फेयर’ सुरु भएको छ । बुटवल उद्योग वाणिज्य संघ रुपन्देहीको आयोजना तथा बुटवल उपमहानगरपालिका र नेपाल उद्योग वाणिज्य महासंघको संरक्षकत्वमा आयोजना गरिएको मेलामा ‘व्यूटि फेयर’ गरिएको छ । आयोजकले काठमाण्डौं उपत्यका बाहिर पहिलो पटक बुटवलमा ‘व्यूटि फेयर’ गरिएको दावी गरेका छन् ।
व्यूटि फेयरको शुक्रबार तिलोत्तमा नगरपालिकाकी उपप्रमुख जागेश्वरीदेवी चौधरीले उद्घाटन गर्दैे व्यूटिपार्लर व्यवसायले महिला उद्यमशिलता पनि बढाएको र आफैमा सम्मानित पेशाको रुपमा स्थापित भएका बताइन् ।
कार्यक्रममा यस क्षेत्रमा रहेर २५ वर्षभन्दा लामो समय व्यूटिपार्लर पेशा व्यवसाय गरेका ६ जनालाई सम्मान गरिएको छ । कार्यक्रममा व्यूटिसियन उशाकिरण गुरूङ, जेनी श्रेष्ठ, सुशिला श्रेष्ठ, सबिता ताम्राकार, कलावती उपाध्याय र बिना श्रेष्ठलाई दोसल्ला ओढाएर सम्मान पत्र प्रदान गरिएको थियो । सम्मान ग्रहण गर्दै जेनी श्रेष्ठले यो सम्मानले आफूहरुलाई ठूलो हौसला र आत्मसम्मान मिलेको बताउँदै संघ प्रति आभार व्यक्त गरिन् ।
कार्यक्रममा बोल्दै बुटवल उद्योग वाणिज्य संघका अध्यक्ष तथा मेला कार्यसम्पादन समितिका संयोजक हरिप्रसाद अर्यालले महिला उद्यमशिलताको विकासका लागि व्यूटि फेयरको आयोजना गरिएको भन्दै अहिले मेला भित्रको मेलाको रुपमा आयोजना गरिएपनि आगामी वर्षमा यसलाई विशिष्टिकृत मेलाकै रुपमा अगाडि बढाउने गरी योजना बनाएको बताए ।
मेला कार्यसम्पादन समितिका सचिव तथा प्रवक्ता मुक्तिप्रसाद अधिकारी, व्यूटि फेयरकी संयोजक रेनु श्रेष्ठ, सम्मानित जेनी श्रेष्ठ, नेपाल व्यूटिसियन संघ रुपन्देहीकी अध्यक्ष अनिता केसी, तिलोत्तमाकी अध्यक्ष अञ्जना केसी लगायतले कार्यक्रमका बारेमा धारणा राखेका थिए ।