बुटवल ९ चैत ।
२३औँ तिलोत्तमा गोल्ड कप नकआउट फुटबल प्रतियोगितामा शनिबारदेखि सुरु भएको छ । प्रतियोगिताको उदटन बुटवल उपमहानगरपालिकाका प्रमुख खेलराज पाण्डेले गरे ।
यो वर्ष पुरस्कार राशिमा अघिल्लो संस्करणभन्दा एक लाख वृद्धि गरिएको छ । रुपन्देही फुटबल संघका अध्यक्ष लोक पुनका अनुसार प्रतियोगिताको उपाधि विजेता टिमले नगद १२ लाख १२ हजार २२२ र उपविजेता टिमले ६ लाख, ६६ हजार ६६६ रुपैयाँ प्राप्त गर्नेछन् ।
यस्तै, विधागत उत्कृष्ट खेलाडीहरूलाई गोलरक्षक, डिफेन्डर, मिड फिल्डर, फरवार्ड, कोचलाई नगद ३१ हजार, कप तथा सर्वोत्कृष्ट खेलाडीलाई स्कुटर वा मोटरसाइकल उपहार तथा प्रत्येक दिनको म्यान अफ दी म्याचलाई नगद ११ हजार १११ रुपैयाँबाट पुरस्कृत गरिने छ ।
यो वर्ष आयोजक करेन्ट रुपन्देही–११ सहित संकटा एफसी, मच्छिन्द्र एफसी, चर्च ब्याइज युनाइटेड, नेपाल पुलिस क्लब, नेपाल सशस्त्र प्रहरी बलको एपिएफ क्लब तथा दुई विदेशी टिम एडोर्न गडवाल स्पोर्टिङ क्लब, जर्जियन एफसी गरी आठ टिमले प्रतिस्पर्धा गर्नेछन् । १६ चैतसम्म सञ्चालन हुने प्रतियोगितामा एक करोड आठ लाख खर्च हुने आयोजकको अनुमान रहेको छ ।
आयोजक करेन्ट रुपन्देही–११ र एपीएफ क्लबबिच भएको उद्घाटन खेल हावाहुरीका कारण स्थगित भएको छ । खेल स्थगित हुनु अघि पहिलो हाफमा एपिएफ ले १–० गोलको अग्रता लिएको छ । निक्कै प्रतिस्प्रर्धात्मक खेलको १७औँ मिनेटमा एपिएफका हरि कार्कीले गोल गर्दै टिमलाई अग्रता दिलाएका थिए ।
दोस्रो हाफ सुरु भएसँगै हावाहुरी चलेपछि खेल रोकियो। लामोसमय मौसम प्रतिकुल भएपछि खेल स्थगित गर्ने निर्णय भएको थियो । स्थगित खेल आइतबार बिहान हुनेछ । आइतबार दिउँसो चर्च ब्याईज युनाईटेड र नेपाल पुलिस क्लबका बिचमा हुनेछ ।