बुटवल २२ मंसिर ।
बुटवलमा आगामी पुस ३ गतेदेखि १७ गतेसम्म हुने १६औँ राष्ट्रिय औद्योगिक प्रदर्शनी, कृषि, प्रविधि तथा पर्यटन महोत्सवलाई उद्योगी र उपभोक्ताको सामीप्यता बढाउने गरी सम्पन्न गर्न लागि परेको आयोजकले बताएका छन् ।
रुपन्देही उद्योग संघको आयोजना तथा बुटवल उपमहानगरपालिका र नेपाल उद्योग परिसंघको संरक्षकत्वमा बुटवलमा हुने प्रदर्शनी तथा महोत्सवका विषयमा काठमाडौंमा पत्रकार सम्मेलन गर्दै संघले प्रर्दशनीको नारा ‘समृद्ध नेपाल निर्माणको आधार, स्वदेशी उद्यमशिलताको विस्तार’ रहेको जनाएको छ ।
स्वदेशी उत्पादनको प्रयोगलाई प्राथमिकतामा राख्ने र नयाँ उद्योग स्थापनालाई प्रेरित गर्ने उद्देश्य सहित यो महोत्सवले उद्योग तथा उपभोक्ताबीचको प्रत्यक्ष सम्पर्कलाई अझ सुदृढ बनाउने अपेक्षा गरिएको आयोजकले जनाएका छन् । आयोजकका अनुसार प्रदर्शनीले स्वदेशी उत्पादनलाई व्यापक प्रचार–प्रसार गर्ने मात्र नभई, देशभरको औद्योगिक सम्भावनाको खोजी, नयाँ प्रविधिको पहिचान, कृषि व्यवसायीकरण, पर्यटन प्रवद्र्धन तथा युवा उद्यमशीलतालाई प्रोत्साहन दिने महत्त्वपूर्ण भूमिका खेल्नेछ । साथै, कला–संस्कृतिको संरक्षण, गोष्ठी तथा अन्तक्र्रिया कार्यक्रम मार्फत ज्ञान आदानप्रदान गर्ने वातावरण पनि निर्माण गरिनेछ। यस वर्षको प्रदर्शनीमा औद्योगिक प्रविधि, कृषि, हस्तकला, गार्मेन्ट, बेकरी र कन्फेक्सनरी, छाला उद्योग, खाद्यान्न, सूचना प्रविधि लगायतका क्षेत्र समेटिएका करिब ४५० स्टल रहनेछन्। प्रदर्शनीलाई हेर्न ८ लाखभन्दा बढी दर्शक आउने र करिब ३० करोड रुपैयाँ बराबरको व्यवसाय हुने अनुमान गरिएको छ ।
महोत्सवलाई विविध तथा मनोरञ्जनात्मक बनाउन लोकदोहोरी प्रतियोगिता, आधुनिक गीत–संगीत प्रस्तुती, हास्य कलाकारका कार्यक्रम, स्थानीय कलाकारका प्रदर्शन, विद्यालय तथा कलेज स्तरका लोकनृत्य र वक्तृत्वकला प्रतियोगिता, लोकभजन प्रतियोगिता र ‘प्रदर्शनी आइडल’ लगायतका विभिन्न सांस्कृतिक तथा प्रतिस्पर्धात्मक कार्यक्रम समावेश गरिएको छ ।
संघले २०४५ सालमा नेपालमै पहिलो पटक र २०५३ सालदेखि निरन्तर औद्योगिक प्रदर्शनी आयोजना गरिएको जनाएको छ । बुटवल स्थित अन्तराष्ट्रिय प्रदर्शनी केन्द्रमा आयोजना हुने औद्योगिक प्रदर्शनीमा स्वदेशी उत्पादन, नयाँ प्रविधि, पर्यटन तथा कृषि उत्पादनसँग सम्बन्धित वस्तुहरूका लागि छुट्टाछुट्टै १० वटा पेभिलियन हुनेछन् ।
नेपाल उद्योग परिसंघका अध्यक्ष वीरेन्द्रराज पाण्डेले अहिले उद्योगीहरु संकटमा परिरहेको बेला रुपन्देही उद्योग संघले निकै ठूलो मेहनत गरेर स्वदेशी उद्योगको उत्पादन प्रवद्र्धन गर्नका लागि गरेको प्रदर्शनीले सबैलाई उत्साह थप्ने र निराशालाई चिर्न सक्ने अपेक्षा गरेको बताए । उनले उद्योगहरु स्थापित नभएसम्म र निजी क्षेत्र बलियो नभएसम्म देशलाई समृद्धिमा लैजान नसकिने भएकाले यो विषयमा ध्यान दिन आग्रह गरे । संघले प्रदर्शनीका मुख्य उद्देश्यहरुमा स्वदेशी उत्पादनहरूको प्रदर्शन र बजारीकरण, प्राविधिक र व्यवसायिक अनुभवको आदान प्रदान, नेपाली उद्योगको लागि अवसरको खोजी, उत्पादन उपभोक्ताविज्ञहरू र सरकारी निकायबीच अन्तरसम्वाद, आन्तरिक तथा बाह्य औद्योगिक वातावरणको जानकारी, निर्यात मूलक उद्योगको पहिचान र प्रोत्साहन, युवा तथा महिला उद्यमीहरूलाई प्रोत्साहन, पर्यटक क्षेत्रका व्यवस्था बारेमा सरोकारवाला बीच छलफल, औद्योगिक जनशक्ति निर्माणलाई राखिएको संघका पूर्व अध्यक्ष तथा नेपाल उद्योग परिसंघका लुम्बिनी अध्यक्ष एजाज आलमले बताए ।
निर्माणको अन्तिम चरणमा पुगेको आधुनिक अन्तर्र्राष्ट्रिय प्रदर्शनी केन्द्रमा आधुनिकस्तरकै स्टल हुनेछन । यसको सजावटदेखि व्यवस्थापन तथा हालसम्म आयोजना भएका प्रदर्शनी भन्दा धेरै भिन्न हुनेछन । स्वदेशी उद्योगका उत्पादन मात्रै प्रदर्शन र तीनको बजारीकरण गर्दै उपभोक्तामा स्वदेशी उत्पादन प्रयोग गर्नुपर्छ भन्ने भावनाको विकास गराउने यो प्रदर्शनीको मुख्य उद्देश्य रहेको संघका अध्यक्ष कृष्णप्रसाद पराजुलीले बताए । आयोजना गर्ने हरेक प्रदर्शनीहरू सधैँ नमूना अर्थात भिन्न खालको हुने गरेको छ । यस पटकको प्रदर्शनीमा नेपाल उद्योग परिसंघले सञ्चालन गरिरहेको मेक इन नेपाल स्वदेशी अभियानलाई थप प्राथमिकताका साथ अगाडि बढाइएको निवर्तमान अध्यक्ष दिलिप सापकोटाले जनाए ।
महोत्सव सफल बनाउन रुपन्देही उद्योग संघका अध्यक्षको संयोजकत्वमा ७५ सदस्यीय मूल समिति, ५१ सदस्यीय विशेष सल्लाहकार समिति, २५१ सदस्यीय सल्लाहकार समिति, साथै निवर्तमान अध्यक्षको संयोजनमा विशेष मूल्याङ्कन समिति तथा २९ वटा विभिन्न उपसमिति गठन गरिएको छ ।