भारतमासमेत प्रचार गरिएपछि उद्योगी उत्साहित

बुटवल २४ मंसिर ।
रुपन्देही उद्योग संघको आयोजनामा पुस ३ गतेदेखि १७ गतेसम्म बुटवलमा हुने १६औँ राष्ट्रिय औद्योगिक प्रदर्शनी, कृषि, प्रविधि तथा पर्यटन महोत्सवका लागि स्टल दर्ताको काम अन्तिम चरणमा पुगेको छ । बुटवल उपमहानगरपालिका र नेपाल उद्योग परिसंघको संरक्षकत्वमा आयोजना गर्न लागिएको यो प्रदर्शनीमा स्वदेशी उद्योगका मात्रै उत्पादन राखिने र काठमाडौ सहित भारतका विभिन्न शहरमासमेत प्रचार गरिएपछि उद्योगीहरु उत्साहित भएको जनाएका छन् । स्टल दर्ता समितिका संयोजक तथा वरिष्ठ उपाध्यक्ष जीवकान्त काफ्लेका अनुसार अहिलेसम्म अधिकांश पेभेलियनमा स्टल दर्ता सकिएको र केहीमा मात्रै बाँकी रहेका छन । ‘जुत्ता, होटल, कपडासहितका धेरै पेभेलियन पूरा भएका छन् केही बाँकी छन, हामीकहाँ स्टल दर्ता हुन आएका पनि धेरै व्यवसायी स्वदेशी उत्पादन मात्रै राख्नुपर्ने हाम्रो नियमले फर्किनुभएको छ’ उनले भने ।
रुपन्देही उद्योग संघले ‘समृद्ध नेपाल निर्माणको आधार, स्वदेशी उद्यमशिलताको विस्तार’ भन्ने नाराका साथ बुटवलस्थित अन्तराष्ट्रिय प्रदर्शनी केन्द्रमा गर्न लागेकोे औद्योगिक प्रदर्शनीमा स्वदेशी उत्पादन, नयाँ प्रविधि, पर्यटन तथा कृषि उत्पादनसँग सम्बन्धित वस्तुहरूका लागि छुट्टाछुट्टै १० वटा पेभिलियन रहने छन् । संघले २०४५ सालमा नेपालमै पहिलो पटक र २०५३ सालदेखि निरन्तर औद्योगिक प्रदर्शनी आयोजना गरिएको जनाएको प्रदर्शनी प्रबन्धक यादव भण्डारीले जानकारी दिए ।
प्रदर्शनीका सदस्य सचिव सुमन बस्यालले अहिले उद्योगीहरु संकटमा परिरहेको बेला संघले स्वदेशी उद्योगको उत्पादन प्रवद्र्धन गर्नका लागि गरेको प्रदर्शनीले सबैलाई उत्साह थप्ने र निराशालाई चिर्नसक्ने अपेक्षाका साथ प्रदर्शनीको आयोजना गरिएको बताए ।
भर्खर निर्माण सम्पन्न भएको आधुनिक अन्तर्र्राष्ट्रिय प्रदर्शनी केन्द्रमा आधुनिकस्तरकै स्टल हुने र यसको सजावटदेखि व्यवस्थापन तथा हालसम्म आयोजना भएका प्रदर्शनी भन्दा धेरै भिन्न हुने सचिव अशोक कुँवरले जानकारी दिए । स्वदेशी उद्योगका उत्पादन मात्रै प्रदर्शन र तीनको बजारीकरण गर्दै उपभोक्तामा स्वदेशी उत्पादन प्रयोग गर्नुपर्छ भन्ने भावनाको विकास गराउने यो प्रदर्शनीको मुख्य उद्देश्य रहेको संघका अध्यक्ष कृष्णप्रसाद पराजुलीले बताए । यहा आयोजना गर्ने हरेक प्रदर्शनीहरू सधैँ नमूना अर्थात भिन्न खालको हुने गरेको छ । यस पटकको प्रदर्शनीमा नेपाल उद्योग परिसङ्घले सञ्चालन गरिरहेको मेक इन नेपाल स्वदेशी अभियानलाई थप प्राथमिकताका साथ अगाडि बढाएको निवर्तमान अध्यक्ष दिलिप सापकोटाले जनाए । प्रदर्शनीको मुख्य उद्देश्य नै स्वदेशी उद्योगलाई प्रवद्र्धन गर्ने भएकाले प्रदर्शनीमा स्वदेशी उत्पादन मात्रै समावेश हुने उनको भनाइ छ । संघले प्रदर्शनीका मुख्य उद्देश्यहरुमा स्वदेशी उत्पादनहरूको प्रदर्शन र बजारीकरण, प्राविधिक र व्यवसायिक अनुभवको आदान प्रदान, नेपाली उद्योगको लागि अवसरको खोजी, उत्पादन उपभोक्ताविज्ञहरू र सरकारी निकायबीच अन्तरसम्वाद, आन्तरिक तथा बाह्य औद्योगिक वातावरणको जानकारी, निर्यातमूलक उद्योगको पहिचान र प्रोत्साहन, युवा तथा महिला उद्यमीहरूलाई प्रोत्साहन, पर्यटक क्षेत्रका व्यवस्था बारेमा सरोकारवालाबीच छलफल, औद्योगिक जनशक्ति निर्माणलाई राखिएको कोषाध्यक्ष विशाल वेलबासेले बताए । स्वदेशी उत्पादनको प्रयोगलाई प्राथमिकतामा राख्ने र नयाँ उद्योग स्थापनालाई प्रेरित गर्ने उद्देश्यसहित यो प्रदर्शनीले उद्योग तथा उपभोक्ताबीचको प्रत्यक्ष सम्पर्कलाई अझ सुदृढ बनाउने अपेक्षा गरिएको सचिव मन्जु भुसालले बताइन । उपाध्यक्ष हरि खत्रीका अनुसार प्रदर्शनीले स्वदेशी उत्पादनलाई व्यापक प्रचार–प्रसार गर्ने मात्र नभई, देशभरको औद्योगिक सम्भावनाको खोजी, नयाँ प्रविधिको पहिचान, कृषि व्यवसायीकरण, पर्यटन प्रवद्र्धन तथा युवा उद्यमशीलतालाई प्रोत्साहन दिने महत्वपूर्ण भूमिका खेल्नेछ । साथै, कला–संस्कृतिको संरक्षण, गोष्ठी तथा अन्तक्र्रिया कार्यक्रममार्फत ज्ञान आदानप्रदान गर्ने वातावरण पनि निर्माण गरिनेछ । यस वर्षको प्रदर्शनीमा औद्योगिक प्रविधि, कृषि, हस्तकला, गार्मेन्ट, बेकरी र कन्फेक्सनरी, छाला उद्योग, खाद्यान्न, सूचना प्रविधि लगायतका क्षेत्र समेटिएका करिब ५ सय स्टल रहनेछन् । प्रदर्शनीलाई हेर्न ८ लाखभन्दा बढी दर्शक आउने र करिब ३० करोड रुपैयाँ बराबरको व्यवसाय हुने अनुमान गरिएको सहकोषाध्यक्ष राजु घिमिरेले जानकारी दिए ।
महोत्सवलाई विविध तथा मनोरञ्जनात्मक बनाउन लोकदोहोरी प्रतियोगिता, आधुनिक गीत–संगीत प्रस्तुती, हास्य कलाकारका कार्यक्रम, स्थानीय कलाकारका प्रदर्शन, विद्यालय तथा कलेज स्तरका लोकनृत्य र वक्तृत्वकला प्रतियोगिता, लोकभजन प्रतियोगिता र ‘प्रदर्शनी आइडल’ लगायतका विभिन्न सांस्कृतिक तथा प्रतिस्पर्धात्मक कार्यक्रम समावेश गरिएको सांस्कृतिक समितिका संयोजक लालप्रसाद बस्यालले बताए ।
महोत्सव सफल बनाउन रुपन्देही उद्योग संघका अध्यक्षको संयोजकत्वमा १०१ सदस्यीय मूल समिति, ५१ सदस्यीय विशेष सल्लाहकार समिति, २५१ सदस्यीय सल्लाहकार समिति, साथै निवर्तमान अध्यक्षको संयोजनमा विशेष मूल्याङ्कन समिति तथा ३० वटा विभिन्न उपसमिति गठन गरिएको छ । यसअघि रुपन्देहीका संघसंस्थाहरुले संघले रुपन्देही बाहिर भारतका विभिन्न शहर तथा काठमाडौमा समेत बुटवलको प्रदर्शनीको प्रचार गरेकोमा धन्यवाद दिँदै यसको ब्राण्ड जोगाउन सहकार्य गर्ने प्रतिवद्धता जनाएका थिए ।